Ұлттық костюмдер конкурсы

Мәскеуде тұратын отандасымыз – көп жылдар бойы Ресей Мемлекеттік Думасының Ұлттар істері комитетінде аппарат басшысы лауазымында болған, қазір осы Комитет төрағасының кеңесшісі қызметін атқаратын саяси ғылымдар докторы, белгілі қоғам қай­раткері Раушан Қанапиянова Мәскеу жұртшы­лығына, Ресей қазақтарына жақсы танымал. Раушан Мұсаханқызының білімі мен білігі, өмірлік тәжірибесі мен ұйымдастырушылық қа­білеті ресейлік қазақтардың қоғамдық ұйым­дарының жұмысын жетілдіріп, жан­дан­дыруға елеулі ықпал етіп келеді. Ол сонымен бірге біраз жылдан бері әйелдердің түркі тілдес ха­лық­тардың дәстүрлерін сақтауға жәр­демде­сетін өңіраралық қоғамдық ұйымын бас­қара­ды. Бұл 1998 жылы Мәскеудегі және Якутия­ның Мирный қаласындағы қазақ әйелдерінің бастамасымен дүниеге келген ұйым. Аталған ұйымның айтулы жобасы деп жылма-жыл дәстүрге айналған ұлттық костюмдер сәнінің халықаралық конкурсын айтуға болады. «Бұл конкурстың мақсаты, – дейді Раушан Қанапиянова – киімдегі һәм тұрмыстағы ұлттық дәстүрлерді тереңірек зерделеуге, әр­түрлі халықтардың мәдениеті мен өнеріне деген қызығушылықты қалып­тас­тыруға, сан алуан мәдениет түрлерінің өзара тоғысуы мен дамуы­на ықпал ету. Этностың қазіргі заманғы жоғары сән үрдістерімен ұштасқан дәстүрлі киімдерінің сан алуан бағалы үлгілерін көрсету». Екі күнге созылған биылғы конкурстағы жеңімпаздар жайына келсек, бірінші орынды Адыгей Республикасының, екінші орынды Абхазияның, үшінші орынды Чешенстанның шеберлері жеңіп алды. Әртүрлі аталымдар бо­йынша алғашқы үштікке көтерілген сән­герлер арасында Мәскеудің, Улан-Батор қалалары­ның, Хабаровск өлкесінің, Мордовияның, Ады­гейдің, Бурятияның, Өзбекстанның, Түр­кі­менстанның, Саха-Якутияның, Арменияның және т.б. өңірлердің өкілдері бар. Аталмыш конкурстың «Халықтық дәстүр­лерді мұқият сақтағаны үшін» деп аталатын арнаулы жүлдесіне Оңтүстік Қазақстан облы­сының Түркістан қаласындағы Х.Яссауи атын­дағы халықаралық қазақ-түрік университетінен келген Мәриям Езиева ие болып, осы оқу орнының бірнеше студенттеріне дипломдар тапсырылды деп хабарлады конкурсты ұйымдастырушылар. Серікқали БАЙМЕНШЕ, Мәскеу.