Мақсат – мәдени кеңістік қалыптастыру

Кеше елордадағы «Radisson SAS» қонақ үйінде Астана Еуразиялық экономикалық қауымдастығы интеграция­лық комитетінің мәдениет жөніндегі кеңесінің ІІ отырысы өтті. Мәжіліске ЕурАзЭҚ-ке мүше мем­лекет­тер­дің мәдениет министрлері мен орын­басарлары қатысты. Жиынға қатысқан қо­нақтардың ішінде Тәжік­стан, Қырғызстан және Қазақ­стан бойынша Алматыдағы ЮНЕСКО-ның кластерлік бю­росының өкілдері де болды. Мәжілісті Еуразиялық эко­номикалық қауымдастығы Ин­теграциялық комите­ті­нің төр­аға­сы Александр Авдеев аш­ты. Ал алғашқы сөз кезегін алған ҚР Мәдениет министрі Мұхтар Құл-Мұхаммед өз сө­зін­де: «ЕурАзЭҚ Инте­гра­циялық комите­ті­нің кеңесі Қа­зақстан Президенті Нұр­сұлтан Назарбаевтың қолдауымен елі­мізде екінші рет өткізіліп отыр.  Өткен жылы ірі халық­аралық ұйымға төрағалық еткен Қазақстан бұл жолы Ислам конференциясына төраға­лық етпек. Бұл ретте, осы жерде сіздерді қабылдап, кезекті отырысты өткізіп отыр­ғанымызға қуаныштымыз», – дей келе ол жыл сайын елімізде халықаралық конкурстар, театр фестивальдері, «Еуразия» кинофестивалі өтіп тұ­ратынына, жуырда ғана онын­шы Мәскеу Пасхальді фестивалі шеңберінде Санкт-Петер­бургтегі В.Гергиев жетекшілік ететін Мария театрының сим­фо­ния­лық оркестрінің кеші Астана мен Алматы қала­ла­рында өткендігіне тоқталды. Одан әрі ол қонақтарды кешке қарай «Қазақ­стан» орталық концерт залында өтетін ШЫҰ-ға мүше мемлекет­тері­нің Өнер фес­тиваліне, сондай-ақ ЕурАзЭҚ халық­та­ры мәде­ниеттері ІІ фестивалінің ашы­лу салтанатына қатысуға ша­қыруды да ұмытпады. Бұдан соң мәжілісте Еуразия эконо­микалық қауым­дас­ты­ғы Интеграциялық комитетіне мүше мемлекеттерден кел­ген мәдениет өкілдері келелі мәселелерді ортаға са­лып, оның шешу жолдарын қа­рас­тырды. Онда ЕурАзЭҚ мүше мемле­кет­тердің мәде­ниет саласына байланысы ту­ралы келісім жобасы, жоба­ның  негізгі бағыттары мен олар­ды жүзеге асыру жолда­ры, ЕурАзЭҚ халықтарының ІІ Мәдениет фестивалі,  ЕурАзЭҚ Ин­те­гра­ция­лық ко­ми­­тетінің хатшылығымен өз­ара түсіністік туралы ме­мо­рандумның орын­далу барысы туралы сөз болды. Сондай-ақ, БҰҰ білім, ғылым және мәдениет жө­ніндегі (ЮНЕСКО) хатшылығымен ара­дағы мәдениет саласына қатысты мәсе­ле­лерге байланысты да әңгіме қозғалды. Және Кеңестің іс-жоспарының страте­гия­лық   бағыт-бағдары талқыланып, қо­ғам­дастықтың жалпы мәдени кеңістігін қалып­тастыруға бағытталған мәдениет саласы бойынша интеграцияланудың нақты механизмдерін анықтау мәселесі де сөз болды. Жұлдыз БАЙДІЛДА.