Қазақстан Республикасы Үкіметінің қаулысы №397

2011 жылғы 7 сәуір           №397              Астана, Үкімет үйі Кең таралған пайдалы қазбалардың тізбесін бекіту туралы «Жер қойнауы және жер қойнауын пайдалану туралы» Қазақстан Республикасының 2010 жылғы 24 маусымдағы Заңының 16-бабының 8) тармақшасын іске асыру мақсатында Қазақстан Респуб­ликасының Үкіметі қаулы етеді: 1. Қоса беріліп отырған кең таралған пайдалы қазбалардың тізбесі (бұдан әрі – тізбе) бекітілсін. 2. Облыстардың, Астана және Алматы қалаларының әкімдері кең таралған пайдалы қазбаларды коммерциялық мақсатта барлауға, өндіруге, бірлескен барлау мен өндіруге келісімшарттар дайындау және жасасу кезінде тізбені басшылыққа алсын. 3. «Кең таралған пайдалы қазбалардың тізбесін бекіту туралы» Қазақстан Республикасы Үкіметінің 1996 жылғы 27 мамырдағы № 645 қаулысының күші жойылды деп танылсын (Қазақстан Республикасының ПҮАЖ-ы, 1996 ж., № 24, 203-құжат). 4. Осы қаулы алғашқы ресми жарияланған күнінен бастап күнтізбелік он күн өткен соң қолданысқа енгізіледі. Қазақстан Республикасының Премьер-Министрі    К.МӘСІМОВ. Қазақстан Республикасы Үкіметінің 2011 жылғы 7 сәуірдегі № 397 қаулысымен бекітілген Кең таралган пайдалы қазбалардың тізбесі 1. Металлургияға арналған кенге жатпайтын шикізат: қалыптық құм; құрамында сазды топырағы бар жыныстар (далалық шпат, пегматит); әктас, доломит, әктасты-доломитті жыныстар, тамақ өнеркәсібіне арналған әктас. 2. Кенге жатпайтын басқа шикізат: отқа төзімді саз; каолин; вермикулит; ас тұзы. 3. Жергілікті құрылыс материалдары: вулкандық кеуек жыныстар (туфтар, шлактар, пемзалар); құрамында суы бар вулкандық шыны мен шыны тәріздес жыныстар (перлит, обсидиан); ұсақ жұмыр тас пен қиыршық тас, қиыршық тас-құм қоспасы; гипс, гипсті тас, ангидрит, гажа; саз және сазды жыныстар (баяу балқитын және тез балқитын саз, суглинка, аргиллит, алевролит, сазды тақта тастар); бор, мергель, мергельді-бор жыныстары; кремний жыныстары (трепел, опока, диатомит); кварцты-дала шпатты жыныстар; шой тас; шөгінді, атқылаудан кейінгі және метаморфалық жыныстар (гранит, базальт, диабаз, мәрмәр); қалыптықтан басқа кұм (кұрылыс, кварц, кварцты-дала шпаты); кұм тас; табиғи пигменттер; ұлутас.