Өнеркәсіптік өңірді өрге бастыру үшін

Кеше Премьер-Министр Кәрім Мәсімов Жезқазған өнер­кә­сіп­тік өңірін дамыту перспективалары жөнінде кеңес өткізді, деп ха­бар­лады Премьер-Министрдің баспасөз қызметі. Қарағанды облысының әкімі С.Ахметов өңірдегі ағымдағы жағдай және даму перспек­ти­валары туралы баяндама жасады. Оны талқылауға Премьер-Министрдің бірінші орынбасары Ө.Шөкеев, Экономикалық даму және сауда министрі Қ.Келімбетов, Білім және ғылым, Ден­сау­лық сақтау, Көлік және коммуникация министрлері, Құрылыс және тұрғын үй-коммуналдық шаруашылық істері агенттігінің төрағасы, Индустрия және жаңа технологиялар, Ауыл шаруа­шы­лы­ғы, Қаржы вице-министрлері, сол сияқты «Қазақмыс» корпора­циясы» ЖШС басқарма төр­ағасы Э.Огай қатысты. Кеңесте Жезқазған өңірінің минералды-шикізат базасын, кен өндіру өнеркәсібі мен металлургия өндірісін одан әрі дамыту, сондай-ақ мемлекеттік үдемелі индустриялық-инновациялық даму бағдарламасы шеңберіндегі жобаларды және көлік инфра­құ­рылымын, әлеуметтік саланы, тұр­ғын үй-коммуналдық шаруа­шы­лықты жаңғырту жобаларын дамыту қажеттігі атап өтілді. Кеңес қорытындысында К.Мә­сімов Экономикалық даму және сауда министрі Қ.Келімбетов басқаратын, мүдделі министрліктер мен ведомстволар бас­шы­лары, Қарағанды облысы әкімдігі және даму институттары басшыларынан құрылған арнайы жұмыс тобын құруды тапсырды. Аталмыш топ бір ай ішінде кеңесте қаралған мәселелерді ой елегінен өткізіп, олар бойынша ұсыныстар түсіруі тиіс.