Ауыл жолы – өмір жолы

Әрідегі асыл арналардан сыр тартсақ: «Жол мұраты – жету». Қазіргі кезеңнің шындығына ден қойсақ: «Қиынның қиыны – жол азабы». Халық қағидасы мен өмір философиясының басты шын­ды­ғы мен алшақ тұстары осыған келіп саяды. Қазіргі кезеңнің шы­найы көрінісі де, пародоксі де осы. Оны көз көрді. Көңіл сенді. БАҚ жүйесінен байқап, біліп-жүргеніміздей, еліміздің жер-же­рінде «жол азабын» азайту бағы­тында маңызды қадамдар жа­са­лып, іргелі істер атқарылып-ақ келеді. Үлкен- кіші қалаларда бір көшенің өзіне әлденеше рет жөн­деу жұмыстары жүргізіледі. Бұл бағытқа – Елбасының дәстүрлі Жолдауы, «Жол картасы» да жаңа тыныс, соны серпін берді. Ақиқатында, «Жол картасы» бағдарламасына енбеген, басшы-қосшылардың назарынан тыс қа­лып келе жатқан ауыл-аймақ­тардың да бар екенін айтқымыз келеді. «Ұзын арқан, кең тұсауға» салмай, ақиқатын айтсақ Ежелгі Тараздан жүз шақырым төңіре­гінде ғана шалғай орналасқан Талас ауданына қарасты «Аққұм» ауылы тұрғындарының аудан һәм облыс орталығына жетуі ертелі-кеш айтып таусылмайтын ілкі ке­зеңдердің ескі ертегісіндей, он­да­ғы жақсы өмір, жарқын бола­шақ­ты аңсаған арман-аңсарларын­дай, тіпті жасыратыны жоқ, оның өзі сынаптай сырғып, сағымдай бұлдырап жан-жүрекке «мәңгілік ұялап», мұң мен шерге айнал­ға­нына да бірнеше онжылдықтар өтті. «Арғы тарихты» айтпағанда, «Бостандық» пен «Талапты» елді мекендерінен шықпа жанымды әлденеше қайталап, жан-жүрек­терін уыстарында ұстаған ауыл тұрғындары «Аққұмды» бетке алғанда-ақ (қайтқан тұстарында да) алға басқан аяқтары кері кете береді. Еркін адымдап, қарышты қадам жасаулары қиынның қиы­ны-ақ. Себебі түсінікті, бар-жоғы бес-жеті шақырым жолды бірнеше сағатта жүреді. Таратып айт­сақ, «Аққұм» мен «Бостандық» ара­сындағы айқыш-ұйқыш, ой­лы-қырлы, ойдым-ойдым жерлерден аяқ алып жүру немесе ай­на­лып өту, басқа да амал-тә­сілдерін жасау – күрмеуі қиын, түйіні мықты, алынбас асуға айналғалы қашан... Ауыл жолы өмір жолы екенін ескерсек, алтын тамырдан нәр алып, кемел келешекке қарышты қадам жасағанға не жетсін! Ауылда да өмір бар. Ауыл мен Астананың арасын жол жал­ғай­ды. Ендеше, сөз жоқ ауыл жолы – өмір жолы екені анық. Жо­лымыз даңғыл болса, өміріміз мән­ді, тұрмыс та сәнді болары хақ. Алыс ауылдың арман-аңсарларының бірі осы. Рақымжан САҒЫМБЕКҰЛЫ, Қазақстан Журналистер одағының мүшесі. Жамбыл облысы, Талас ауданы, «Аққұм» ауылы.