Аталмыш олимпиадада алғырлығымен топ жарғандардың қатарында №38 «Шаттық» балабақшасының тәрбиеленушісі Толғанай Есілбай да бар. Осы балабақшаның меңгерушісі Сәуле Нұрғалиқызының айтуынша, іріктеу турынан өткен Толғанай енді қалалық олимпиадаға әзірленіп жатыр.
– Әр жыл сайын білім басқармасы ұйымдастыратын «Жаңа жыл жұлдыздары» атты республикалық балалар би байқауында біздің бүлдіршіндеріміз 1-орын дипломымен бірнеше рет марапатталды. «Шағала» тобының тәрбиеленушісі Толғанай Думанқызы әншілік өнерімен де көрермендерді тәнті етіп келеді. Жуырда «Қылықты қыз – құндыз, ұлықты ұл – жұлдыз» атты қалалық қыз сынына қатысып, «Шаттық аруы» атағына ие болды. Сондай-ақ, Қазақ радиосына 95 жыл, «Шалқар» радиосына 50 жыл толуына орай «Шалқар» радиосы ұйымдастырған республикалық ән байқауында «Туған жер» әнімен жеңіске жетіп, келесі турға Алматы қаласына барып жүлделі оралды. Толғанай сияқты дарынды балалардың арқасында балабақшамыздың бүгінде рейтингі жоғары, – дейді Сәуле Нұрғалиқызы.
Төрт жасынан бастап Астанадағы Оқушылар сарайында Сәуле Андыбаева сынды білікті маманнан ән бойынша дәріс алып, өнерін шыңдаған дарынды балақай ұстаздарының үмітін әрдайым ақтаумен келеді. Балаларға арналған көптеген шығармашылық фестивальдарда жүлдегер атанып жүр. Атап айтсақ, мектепке дейінгі балалық шақ республикалық орталығы ұйымдастырған «Ұлы дала ұрпақтары» атты қалалық байқауда «Жезтаңдай әнші» аталымы бойынша бас жүлде алса, ел тәуелсіздігінің мерейтойына арналған I Республикалық «Жас дарын» өнер байқауында Гран-приге ие болып, Президенттік шыршаға жолдаманы жеңіп алды. «Ақ көгершін», IV қалалық «Талант және сұлулық сайысы – Астана 2016» байқауына қатысып, ІІ дәрежелі лауреат атанды. «Астана шуақтары» атты балалар шығармашылығы фестивалінен 2-орын алып, дипломмен марапатталды.
Балдырғандардың дарыны мен қарым-қабілетін шыңдап, табиғи талантын өрістету тәрбиешінің білім-білігіне байланысты екені даусыз. Осы орайда, Толғанайды өнерге баулып жүрген тәрбиеші Айжан Кәрімованың еңбегі ерекше екенін айта кетсек артық болмас.
Еркін елдің ертеңін тәрбиелеу балабақшадан бастау алады емес пе. Ұлттық тәрбиенің тәлімін бойына дарытқан Толғанайлардың биік өресі арқылы Қазақ елінің мәртебесі де асқақтай түсетіні анық. Ендеше, жұлдызың жана берсін, Толғанай дегіміз келеді.
Ая ӨМІРТАЙ,
«Егемен Қазақстан»