Денсаулық сақтау министрі Елжан Біртанов таныстырған заң жобасы Әлеуметтік медициналық сақтандыру қорына жарналар мен аударымдардың мөлшерін қайта қарау, сондай-ақ, жарна төлеушілердің тізбесін анықтау мақсатында әзірленген. Осыған байланысты аталған заң жобасында Қазақстан аумағында тұрақты тұратын шетелдіктер мен азаматтығы жоқ адамдарға тегін медициналық көмектің кепілдік берілген көлемі шеңберінде және міндетті әлеуметтік медициналық сақтандыру (МӘМС) жүйесінде ел азаматтарымен бірдей медициналық көмек алу құқығын ұсынуға қатысты норма көзделген. Ал аударымдар мен жарналар төленбеген жағдайда, МӘМС жүйесіндегі медициналық көмекке азаматтардың құқығы бойынша норма нақтыланады.
«Міндетті әлеуметтік медициналық сақтандыру жөніндегі заң жобасы бойынша мөлшерлемелерді және аударымдар мен жарналарды есептеу нысандарын өзгерту, төлеушілердің жаңа санаттарын, олар үшін жарналарды мемлекет жүзеге асыратын адамдардың санаттарын енгізу, Әлеуметтік медициналық сақтандыру қорының жұмысын ұйымдастыру және міндетті әлеуметтік сақтандыру мен тегін медициналық көмектің кепілдік берілген көлемі жүйесінде дәрі-дәрмекпен қамтамасыз ету мәселелері тұрғысында түзетулер қарастырылып отыр», – деді министр Е.Біртанов.
Елдегі макроэкономикалық жағдайға байланысты, жұмыс берушілерге түсетін жүктемені төмендету мақсатында олардың аударымдарының деңгейін төмендету мен жеке кәсіпкер жарналарының мөлшерін бекіту ұсыныстары енгізілгендігіне тоқталған баяндамашы биылдан бастап төленетін жарна көлемі мен мерзімдерін атап өтті.
«Мемлекеттің қорға төлеуге жататын міндетті әлеуметтік медициналық сақтандыру жарналар мөлшері 2018 жылдың 1 қаңтарынан 3,75 пайыз деңгейінде ұсынылады. Жұмыс берушілердің сақтандыру аударымдары 2017 жылғы 1 шілдеден бастап 1 пайыз, ал 2018 жылғы 1 қаңтардан 1,5 пайыз болуы ескерілген. Өзін өзі жұмыспен қамтыған халықтың жарналары ең төменгі екі жалақыдан 5 пайызды құрайды», – деді министр.
Айта кетейік, медициналық көмектің қолжетімділігін қамтамасыз ету мақсатында жарналарын мемлекет төлейтін адамдар санатына 4 жаңасын қосу ұсынылады. Осы орайда жұмыс істемейтін 18 жасқа дейін мүгедек балаға күтімді жүзеге асыратын азаматтар, жұмыс істемейтін оралмандар, Қазақстан аумағында тұрақты тұратын шетелдіктер мен азаматтығы жоқ адамдар, үш айдың ішінде орта техникалық және кәсіптік орта білімнен кейінгі жоғары білім беру, сондай-ақ, жоғары білімнен кейін білім беру ұйымдарында оқуын аяқтаған адамдар қамтылады.
Отырыста депутаттар «Жол жүрісі туралы» Заңға өзгерістер енгізу туралы» заң жобасын талқылады. Мәжілістегі Заңнама және сот-құқықтық реформа комитетінің мүшесі Қанат Мусин таныстырған құжатта жолаушылардың полиция қызметкерінің рұқсатынсыз көліктен шығуына рұқсат беретін өзгеріс енгізу көзделеді.
«Көлікті тоқтатқаннан кейін полицейдің міндеті заң жүзінде бекітіледі: көлікке бірден келіп, өзін таныстырып, қызметтік куәлігін көрсетіп, тоқтату себебін түсіндіріп, техникалық құрал қолданылса, ол туралы мәлімет беруі тиіс. Осы уақытқа дейін бұл міндеттер Ішкі істер министрінің бұйрығында ғана болған еді және ол әрдайым орындала берген жоқ», – деді Қ.Мусин.
Сонымен қатар, көлік тоқтатылған кезде жүргізушінің полицейдің іс-әрекетін видеоға түсіру құқығы заң жүзінде бекітіледі және полицейдің қызметтік өкілеттілігін асыра пайдалануға жол беретін нормаларды алып тастау мақсатында арнайы шаралар тізімі қабылданады. Сондай-ақ, тағы бір өзгерістің бірі – мерзімі өткен жүргізуші куәлігін ауыстыру кезінде міндетті түрде емтиханды қайта тапсыру міндеттелмейтін болды. Сол сияқты, жолаушылар тасымалымен ұдайы айналыспайтын көліктерге түнгі уақытта жолаушылар тасымалдауға салынған тыйым мен көліктерге аэрографиялық суреттерге салынған тыйым алып тасталады. Бағдаршам алдында тоқтау керек сызықтан асып кеткені үшін айыппұл көлемі 5 АЕК-тен 3 АЕК-ке дейін төмендетіледі деп күтілуде.
«Бұл жерде Әділет министрлігі өзге де мүдделі мемлекеттік органдар мен қарапайым адамдарды қатыстыра отырып, «Қазақстан Республикасының Әкімшілік құқық бұзушылық туралы кодексіне өзгерістер мен толықтырулар енгізу туралы» заң жобасын дайындап жатыр. Бұл арқылы жол қозғалысы ережелерін бұзуға салынатын бірқатар айыппұлдар мөлшері төмендеп, ескерту сияқты шаралардың қолданылу мүмкіндігі артады. Ал заң жобасы Мәжіліске биыл жазда қарауға беріледі деп жоспарлануда», – деді депутат.
Жалпы отырыс аясында депутаттар Қаржы министрі Бақыт Сұлтановтың таныстыруымен «2015 жылғы 8 қыркүйектегі «Табиғи теріден жасалған киім заттары, киімге керек-жарақтар және өзге де бұйымдар» тауар позициясы бойынша тауарларды бақылау (сәйкестендіру) белгілерімен таңбалауды енгізу жөніндегі қанатқақты жобаны 2015-2016 жылдары іске асыру туралы келісімнің қолданылу мерзімін ұзарту жөніндегі хаттаманы ратификациялау туралы» заң жобасын талқылады. Оған қоса, «Қазақстан Республикасының кейбір заңнамалық актілеріне оларды Қазақстан Республикасы Конституциясының нормаларына сәйкес келтіру мәселелері бойынша өзгерістер мен толықтырулар енгізу туралы» заң жобасы мен «Еуразиялық экономикалық одаққа мүше мемлекеттер арасындағы қызметтік және азаматтық қаруды өткізу туралы келісімді ратификациялау туралы» заң жобасына қорытынды әзірлеу жөнінде қаулы қабылданды.
Нұрлыбек ДОСЫБАЙ,
«Егемен Қазақстан»
