Байқаудың ең кішкентай қатысушысы алты жасар Елисей Мысин (Ресей) мен Артур Михлин (Қазақстан) «Қазақстан үміті» марапатына лайық деп танылды. Симфониялық оркестрмен өнер көрсетіп үйренген Елисей Астана сахнасын жатырқамады. Салтанатты марапаттау кешінде норвег композиторы Эдуард Григтің «I Dovregubbens Hall» «Тау королінің үңгірінде» композициясын орындап, сахнамен қоштасқысы келмей, көпшілікті бір күлдірді. Ресейдің Ставрополь қаласынан келген Елисей – бүкілресейлік және халықаралық байқаулар мен фестивальдардың жеңімпазы.
– Төбесінде үлкен шары бар алып баған (сірә «Бәйтерек» болса керек) маған қатты ұнады. Мұнда барлығы жап-жаңа екен. Мен Астанаға тағы да қыдырып келгім келеді, – дейді алты жасар балақай.
Бәйгеде бақ сынаған 18 жасқа дейінгі – бастауыш, орта және жоғары музыкалық білім мекемелерінде оқитын жас пианистерге байқау шарты бойынша қазақстандық композиторлардың шығармасын орындау міндеттелген болатын. Осы тұрғыда Қазақстан композиторы Н.Меңдіғалиевтің «Домбыра туралы аңыз» атты туындысын фортепианода үздік орындағаны үшін Петр Акуловқа (Ресей) арнаулы сыйлық тапсырылды. Он жасар талапкер өткен А.Бакулов атындағы II Бүкілресейлік жас пианистер байқауының I сыйлық иегері. Жалпы, жарысқа қатысып жатқан жүлдегерлердің қай-қайсысы да осал емес.
Салтанатты жиында сөз алған Мәдениет және спорт министрі Арыстанбек Мұхамедиұлы көпшілікті фестивальдың сәтті аяқталуымен құттықтады.
– Әлемнің отызға тарта елінен қатысқан 130-ға жуық баланың әрқайсысы іріктеу турында қазақстандық композиторлардың шығармаларын орындады. Өз елінің інжу-маржандары саналатын жас музыканттардың арқасында ұлтымыздың композиторлары әлемге таныла түсті, – деді министр.
Бір аптаға созылған музыкалық байқауда үміткерлер тамаша өнер көрсетіп, болашақтарынан үлкен үміт күтуге болатындығын дәлелдеді. Жас ерекшеліктеріне қарай бөлінген үш топтың үздіктеріне сыйлықтар табыс етілді.
Әлемнің түкпір-түкпіріндегі таланттарға қолдау білдіру, халықаралық шығармашылық байланыстарды кеңейту мақсатында жас пианистердің халықаралық байқауы Астанада 2013 жылдан бері өткізіліп келеді. Жобаның көркемдік жетекшісі – орыс фортепиано мектебін жаңғырту жолында жаңашылдығы мен көркемдік талдауларымен ерекшеленетін Денис Мацуев. Талантты пианистің бірнеше жылдық гастрольдік кестесі алдын ала құрылады. Ол бір айда әлемнің жиырмадан астам елінде концерт береді, солардың қатарында Астана да бар.
– Фестивальдың фантастикаға толы әсерін сөзбен айтып жеткізу қиын. Бізбен бірге болған баршаңызға алғысым шексіз. Астана біздің конкурсымыздың ажырамас бір бөлігіне айналды. Бүгін Астанада классикалық музыка өнерінің жаңа жұлдыздары дүниеге келді деп сенімді түрде айта аламын, – деп қатысушылар мен көрермен қауымға жылы лебізін арнады әлемге әйгілі музыкант.
Ая ӨМІРТАЙ,
«Егемен Қазақстан»
Суретті түсірген Орынбай БАЛМҰРАТ, «Егемен Қазақстан»
