Сапар барысында А.Мамин Түрікменстан Президенті Г.Бердімұхамедовпен кездесіп, Экономикалық, ғылыми-техникалық және мәдени ынтымақтастық жөніндегі 9-шы Қазақстан-Түрікменстан үкіметаралық комиссиясының отырысына қатысты.
Премьер-Министрдің бірінші орынбасары А.Мамин үкіметаралық комиссия отырысының ынтымақтастықты одан әрі дамытуға және тереңдетуге елеулі серпін берген Түрікменстан Президентінің 18-19 сәуірдегі Қазақстанға мемлекеттік сапарынан кейін іле-шала өтіп отырғанын атап өтті.
Тараптар көлік инфрақұрылымы мен ортақ шекараны ескергенде екі ел арасында өзара тиімді ықпалдастықты жолға қою үшін үлкен әлеуеттің бар екенін айта отырып, екіжақты сауданы айтарлықтай өсіру үшін күш-жігерді шоғырландыру қажет екенін атап көрсетті.
2016 жылы сыртқы сауда айналымы 2015 жылмен салыстырғанда 59 пайызға артып, 283,5 млн АҚШ долларын құрады.
Тараптар Түрікменстан Президентінің Қазақстанға мемлекеттік сапары шеңберіндегі жоғары деңгейде қол жеткізілген уағдаластықтарды жүзеге асыру бойынша, соның ішінде орта мерзімді перспективада тауар айналымын 1 млрд АҚШ долларына дейін жеткізуде екіжақты шаралар қабылдау қажеттігін атап өтті.
Түрікменстан Президенті Г.Бердімұхамедов өз елінің Астанада өтетін ЭКСПО-2017 халықаралық мамандандырылған көрмесіне белсенді қатысуға ниетті екенін білдірді.
Сол күні Ашғабадта Қазақстан Премьер-Министрінің бірінші орынбасары А.Маминнің және Түрікменстан Министрлер кабинеті Төрағасының орынбасары Б.Аннамередовтің төрағалығымен Экономикалық, ғылыми-техникалық және мәдени ынтымақтастық жөніндегі Қазақстан-Түрікменстан үкіметаралық комиссиясының 9-шы отырысы өтті.
Оған қатысушылар бұған дейін қол жеткізген уағдаластықтарды жүзеге асыру барысын талқылап, ынтымақтастықтың, отын-энергетика секторын, көлік-коммуникация саласын, ауыл шаруашылығын, қоршаған ортаны қорғау, білім беру мен мәдениетті қоса алғанда, басым бағыттарын дамыту бойынша нақты шаралар белгіледі.
Отырыста қазіргі бар келісімшарттық-құқықтық базаны жетілдіру, сауда-экономикалық байланыстарды ұлғайту, экспорттық-импорттық операциялар көлемін арттыру, жеткізілетін тауарлар мен көрсетілетін қызметтердің номенклатурасы мен көлемдерін кеңейту есебінен экономикалық ынтымақтастықты нығайту қажеттігі атап өтілді.
Қазақстандық компаниялардың Ашғабад – Ауғанстан шекарасы жолы учаскесінің құрылысына қатысуы, 243 шақырымға созылатын Турменабат -Мары темір жолының учаскесін жаңғыртуға, сондай-ақ, Фарап қаласындағы рельс дәнекерлеу кәсіпорны мен Сердар қаласындағы вагон жөндеу зауытын жаңғыртуға қатысуы туралы алдын ала уағдаластықтарға қол жеткізілді.
Оның сыртында тараптар Түрікменстан үшін ғарыш аппараттары құрылысының жобасын және ғарыш саласындағы мамандарды оқыту, Маңғыстау облысы мен Балкан уәлаятында шекаралық сауда аймағын құру, Аралды халықаралық құтқару қоры шеңберіндегі ынтымақтастық мәселелерін талқылады.
