Атқарушы биліктің Cемейге сапары

Аптаның соңында Қазақстан Республикасы Премьер-Министрінің орынбасары – Индустрия және жаңа технологиялар министрі Әсет Исекешев жұмыс сапарымен Шығыс Қазақстан облысында болды. Премьер-Министрдің орынбаса­ры сапарын жұма күні Семейден бас­тады. Онымен бірге Семейге атқарушы билік, банк және ұлттық ком­паниялар өкілдері, сондай-ақ парламенттік топ мүшелері келді. Олар ең алдымен «Тепло­ком­мунэнерго» мемлекеттік кәсіп­ор­нына қарасты бірінші жылу ор­та­лығында болып, ондағы жұмыс­пен танысты. Бұл орталық биыл­ғы жылы іске қосылған болатын. Үкімет тарапынан бөлінген 7 миллиардтан астам теңге су жы­лыту қазандығының құрылысына жұмсалған-ды. Ал қазір жылу ор­талығының жетінші қазанды­ғы­на жөндеу жұмыстары жүргізілуде. Химиялық су тазарту кешенінің, жанар-жағар май жеткізу же­лісі­нің және жаңа су қондырғы­лары­ның құрылысы да биылғы жылы аяқталмақ. Қала басшылығы мә­лім­деп отырғанындай, Үкімет та­рапынан Семей қаласының ком­му­налдық жүйесін жандандыруға жасалып жатқан қамқорлықта кемшін жоқ. Сондықтан жылдар бойы қордаланып келген бұл күрделі мәселенің оң шешім табатын күні де алыс емес. Үкімет басшысының орын­басары бұдан кейін «Шығыс су­сындары» жекеменшік серіктестігінде болды. Елімізде шөлмек дайындайтын екі зауыттың бірі осында. Өкінішке қарай, қала бюд­жетіне қыруар қаржы құйып келген бұл кәсіпорын соңғы жыл­дары  тоқырап қалған-ды. Енді ол қайтадан қатарға қосылып жатса, нұр үстіне нұр болар еді. Әсет Исекешев келесі кезекте тері өңдеумен және бәсекеге қа­білетті тері-жүн өнімдерін дай­ын­даумен айналысатын «Семей жүн-тері» жекеменшік серіктестігінде болып, аталған кәсіп­орын­ның жай-күйімен танысты. Об­лыс әкімі Бердібек Сапарбаев қо­нақтарға аталған кәсіпорындар­дың тыныс-тіршілігі хақында то­лық түсінік берді. Бұдан кейін Премьер-Ми­нистр­дің орынбасары  Өске­мен­дегі «Востокмашзавод» және «Конденсатзавод» акционерлік қо­ғамдарында болды. Ал бүгін оның қатысуымен облыстық әкім­дікте өңірдегі кейбір кәсіп­орын­дардың бола­шақ­тағы дамуы және елі­міздің үдемелі индус­трия­лық-ин­новациялық бағдарла­ма­сын үй­лес­тіру жөнінде ке­ңес­тер өткізіледі деп күтілуде. Дәулет СЕЙСЕНҰЛЫ. Семей.