Суретшілер симпозиумы

Өткен жексенбіде Астана күні мерекесінің мәдени іс-шаралар бағ­дарламасы аясында «Астана-Бәй­терек» монументі жанында Қа­зақ­стан суретшілерінің республика­лық симпозиумы өз жұмысын бастады. Ел тәуелсіздігінің 20 жылдық шежіресінде еліміздің экономи­ка­сы, білімі мен ғылымы, өнері мен мәдениеті ғарышты қарқынмен да­мы­ды. Жаңа астананың бүгінгі ба­ламасыз сәні мен сәулетіне Суретшілер одағы шығармашылық ұжы­мы­ның қосқан үлесі мол. Қаладағы «Қазақ Елі», «Жер Ана» ескерткіш-монументтері, «Арай» этносаяба­ғын­дағы мүсіндік жобалар, Абай, Бөгенбай, Жәнібек пен Керей, Сә­кен Сейфуллин ескерткіштері қала бойынша ландшафтық декоративтік пішіндер, Ақорда, Салтанат са­ра­йы, Мәжіліс, Үкімет үйі, әкім­шілік ғимараттары интерьерлері қа­зақстандық суретшілердің кескіндеме туындыларымен безендірілсе, «Думан» ойын-сауық орта­лы­­ғының, «Джунгли» аттракцио­ны­ның, көркем-декоративті жұ­мыс­тары толығымен Астана қала­сы суретшілерінің қолынан шық­қан. Ал мұндай ауқымды шара­лар­дың іс жүзіне асуы суретшілерге деген мемлекет тарапынан көрсе­тіл­ген үлкен сенім екендігі сөзсіз. Бейнелеу өнері бойынша әлем­де симпозиумдар мен түрлі форумдар ұдайы ұйымдастырылып оты­рады. Осы жылдың өзінде 330-дан аса маңыз­ды симпозиумдар, конференциялар, көрмелер мен форумдар өткізу ісі жоспарланған. Сол шара­лардың бірегейі – Қазақстан сурет­шілерінің республикалық симпо­зиу­мы. Оны өткізудегі басты мақ­сат – бейнелеу өнерін насихаттау, қала тұрғындары мен қонақтарын рес­пуб­ликамыздың барлық облыс­тары­нан келген суретшілер шығар­ма­шылығымен таныс­тыру, суретшілер арасында тәжі­рибе алмас­тыру. Еліміздің 14 облысынан келген 22 қылқалам шеберлері қатысқан симпозиумда Парламент Сенаты­ның депутаты Ғарифолла Есім: «Адам өмірге келгенде әсемдікке құштар бо­ла­ды ғой. Бірақ, өсе келе сол әсем­дікке құштар қасиетті өз бойында сақтай алады ма? Көп жағдайда сақ­тай алмай қаламыз. Сол бір жақсы дағдыны бойында ұстап қалатын адамдардың тобын суреткерлер құрайды. Сондық­тан да біз сіздерге бас иеміз», – десе, Суретшілер ода­ғы басқарма­сы­ның төрағасы Байтұр­сын Өмір­беков: «Астана қаласының әкім­ші­лігі, Мәдениет басқармасы ұйым­­дас­тырып отырған осынау шара­ның маңызы өте зор. Қолға алынып отырған жаңа бастаманың аяғы керемет шараларға ұласады деп ойлай­мын. Мұндай ізгі бастамалар мәде­ниеттің дамуына ықпал ететін бір­ден-бір сара жол», – деді. Суретшілер одағының шығар­машылық ұжымы халықаралық, республикалық деңгейдегі көрм­е­лерге, байқауларға, сондай-ақ сим­позиумдарға қатысып, ел мә­де­н­иетін шет елдерге танытып, абыроймен еңбек етуде. Бұл ретте, Астана қаласы Суретшілер одағының басқарма төрағасы Қо­ңыр Мұхамедиев 2007 жылы Астанада әлемнің 12 мемлекетінен шақырылған халықаралық таны­мал суретшілер симпозиумы өт­кен­дігін айта келе: «Бүгін Тәуел­сіз Қазақстанның барлық облыс­тарынан шақырылған бейнелеу өнерінің белгілі қайраткерлерінің басын қосып, шалғайдағы сурет­шілеріміздің өнерімен Астана жұртшылығын, қала қонақтарын таныстырып, дүбірлі мерекеміз­дің тамаша бір бөлігі ретінде ұйымдастырып отырмыз», – деп атап көрсетті. Симпозиумға қаты­су­шы әріптестерінің жұмы­с­тары­на шығармашылық табыс, мерекелік көңіл-күй тіледі. Симпозиумға қатысушы су­рет­шілердің бір тобы «Бәйтерек» монументі жанындағы сулы-жа­сыл аймақта шеберлік мектебін өт­кізсе, екінші топ Есіл өзені жаға­сындағы «Астана көрініс­тері» атты пленарлық жұмыс­тар­ға қа­тыс­ты. 4-ші шілде күні аталған екі топ орын ауыстырды. 5-ші шілдеде қылқалам шеберлері «Тәуел­сіз­дік жылдарындағы бейнелеу өне­рі­нің қалыптасу ке­зе­ңі» тақыры­бында дөңгелек үс­тел, «Тәуел­сіздіктің 20 жылды­ғы» атты шеберлік мектебін ұйым­­дастырса, Астана күні мерекесі аталатын 6-шы шілдеде сим­по­зиум­ның салтанат­ты жабылу рәсімі өтеді деп жоспарлануда. Сондай-ақ, шеберлік сыныбы конкурсы аясында суретшілерге ақшалай сыйлықтар тап­сы­рыла­тын болады. Жұлдыз БАЙДІЛДА.