Ақсақалдың Астанаға тартуы

Еңселі елорданың ту­ған күні елім деп тебіренген әр азаматтың бойын ерекше сезімге бөлесе, енді бірін тойға не тарту етемін деген сұрақтар ма­за­лайды. Олар осы жолда қарлығаштың қанатымен су сепкендей барын са­лады. Солардың бірі Астана күні мерекесі мен ел Тәуелсіздігінің 20 жыл­дық торқалы тойына тарту ретінде велосипедпен Ал­матыдан Астанаға дейінгі аралықта жолға шыққан Айтекен Бәкә­тайұлы ақ­сақал. Кеше елорда жұрт­шылығы осы­дан бір жеті уақыт бұрын ару Алма­тыдан арқа төсіне бет алған ақ­сақалды «Бәй­те­рек» мо­ну­ментінің ал­дын­да сал­танатты жағ­дай­да қарсы алып, сый-сыя­паттарын көрсетті. Жетпістің желмая­сы­на мінген ол жа­сым келді деп қарап отыратындар қата­рынан емес. Күніне 180-190 шақырымды арт­­қа тастаған қария бұл жолға айға жуық дайын­далыпты. – Алматыдан Астанаға велосипедпен жүрудегі үш мақсатым бар. Біріншісі, әрине, Астана күніне орай болса, екіншісі Тәуелсіздігіміздің 20 жылдығы, ал соңғысы Қазақстанды төрткүл дүниеге танытуда ерен еңбегімен ерекшеленген Ел­басы Нұрсұлтан Назарбаевтың туған күні құрметіне тартуым болып табылады,- дейді саламатты спорт­ты жанына серік еткен Айтекен ақсақал. Сон­дай-ақ, ол журналистерге жолай кездескен қи­ын да, қызықты сәт­тер­ден де әңгіме өрбітті. Мәселен, Бал­хашқа жет­кенде жел соғып, қиыр­шық құм бора­ған­нан аз­даған қо­лай­сыз­дықтар орын алса, жолда та­мақ­танатын ас­ха­налар­дың аз болғанын ­да ай­тады. Алайда, ол ұлттық су­сынымыз қы­мыз бен қасиетті қара нанның арқасында бұл қиын­дық­қа да тосқау­ыл қоя білген. Қытай Халық Рес­пуб­ли­касының Кінсуар- Құлжа қазақ облысы, Тарбағатай ауданы, Дүр­біжін ауданы, Жылан­тыл ауылында дүниеге келген А.Бәкәтайұлы 2007 жылы Алматы-Үрімжі, ал 2008 жылы Тар­ба­ғатай-Пекин жерлерін (барлығы 4300 шақы­рым) жүріп өткен. Ал­дағы уақытта ақсақал бұйыртса, 2012 жылы Лон­донда байрағы көте­рілетін ХХХ жазғы Олим­пиа­да қарса­ңында сол жаққа велосипедпен сапар шегуді жоспарлап отыр. Алдына ос­ындай үлкен мақсат қойған қарияға сәттілік қашанда серік болғай. Қызғалдақ ЗҰЛПЫХАРҚЫЗЫ, студент.