Көрмеге келіңіздер

Алматыдағы Ұлттық кітапханада Қазақстан Республикасы тәуелсіздігінің 20 жылдық мерейтойы аясында және Астана күніне орай «Астана – Отанымыздың жүрегі» атты кең ауқымды кітап көрмесі ашылды. Алматы қаласы әкімдігі мен Ұлттық кітапхананың бірлесіп ұйымдастыруымен ашылған көр­меге кітапхана қорынан алынған қазақ және орыс тіліндегі 2 мың­нан астам әдебиеттер қойылған. Онда Сарыарқа төріндегі Ел­орданың бүгінгі күнге дейінгі дамып, өркендеуі жайлы сыр шертетін еңбектер бар. Ұлттық кітапхананың бас ди­ректоры Гулиса Балабекова­ның айтуынша, бұл ауқымды көр­мені Астана күні мен Елба­сының ту­ған күніне және ел тәуелсіздігінің 20 жылдығына арнаудағы басты мақсаттары –  көркейіп, гүлденіп келе жатқан Астанамызды көр­сету. «Өйт­кені, бүгінгі Елордамыз – қа­рыш­тап дамыған мемле­кетіміз­дің символы болғандық­тан, со­ны оқырмандарымызға мақ­танышпен жинақтап көр­сету­ге тырыстық» дейді ол. Көрме аясында «Қазақстан Мэтрдің көзімен» атты ел Пре­зидентінің тұңғыш жеке фото­графы Иосиф Будневичтің фото­суреттерінің көрмесі ашылды. Көрмеге 70-тен аса фотосуреттер қойылған. – Ең алдымен Қазақстан хал­қын ел тәуелсіздігінің 20 жылдығымен құттықтаймын. Біздер көрмеден Қазақстанның жаңа астанасы жайында көп­теген ма­ғлұматтарға қанық болдық. Ондағы кітаптар, фотоальбомдардан қазіргі заман­ға лайықты, модерлендірілген, күн сайын өркен жайып келе жатқан респуб­ликаның жүре­гінде орналасқан Астананы көр­дік. Алдағы уақытта да қазақ елінің бұдан да әрі өсіп, өркендеуіне куә боламыз деп ойлаймын, – деді көрме қонақ­тарының бірі Иран Ислам Рес­публикасының еліміздегі ел­шісі­нің мәдениет жөніндегі кеңесші­сінің орынбасары Мохаммед-Реза Саттари мырза. Гүлзейнеп СӘДІРҚЫЗЫ.