Кедендегі кесірлік. Доптағы доғалдық

Шаласауаттылар мемлекеттік рәмізді  қашанға дейін қорлай береді? Мемлекеттік Ту – еліміздің ең қастерлі рәмізі. Президентіміз өзін ұлықтауға арналған сал­танатты сәтте басын иіп, ең ал­дымен туған мемлекетінің Туын сүйеді. Елбасымыз шетелге іссапарға барғанда өз рәмізінің әлгі елдің Туымен бірге желбіреп тұрғанына және марқаяды. Сосын... үздік спортшыларымыз Олимпиада ойындары мен әлем, Азия чемпионаттарында жеңіс тұғырына көтерілгенде оң қо­лын жүрегінің тұсына қойып, Әнұран әуенімен әуелеп бара жатқан туған елінің Туына тік қа­рап тағзым етеді. Осылай да осылай тізе берсек, тәуе­л­сіз­дігінің жиырма жылдығын тор­қа­лы тойға ұластырғалы отыр­ған еліміздің ең басты рәміз­дері­нің бірі – мемлекеттік Ту­дың қадірі мен қасиетін айтып тауыса алмаспыз, сірә. Бірақ, өкінішке қарай, кейде бізде осы қастерлі рәмізді құр­меттеу, оны жеке бастың мүд­де­сінен жоғары қоя білу жағы кемшін түсіп жатады. Жақында, атап айтсақ, мамыр айында Жамбыл облысындағы «Сортөбе» бақылау-өткізу бекетінде еліміз­дің мемлекеттік Туының «аяғы ас­панға қарап» тұрғанын бір әріп­тесіміз суретке түсіріп алыпты. Бұған жол берген осындағы бас маман Р.Хасенов екен. Жамбыл об­лысы бойынша кедендік ба­қылау департаментінің бастығы М.Сатыбалдиннің жергілікті ба­сы­лымдардың біріне берген жауа­бына сүйенсек, әлгі қызметкер туды ауыстыру кезінде «байқа­ма­ған». Сол үшін тәртіптік жазаға тартылыпты-мыс. Біздіңше, ол шы­ғарып салма жауап сияқты. Өздері­ңіз ақылға салып көріңіздерші, құр­метті оқырман, егер фототілшінің қырағы көзіне ілікпегенде әлгі «төң­керілген» Туымыз кеден қыз­меткерлерінің сауатсыздығын әш­керелеп қанша уақытқа дейін тұра берер еді. Ал ары да бері ағылған шетелдіктер, олардың ішіндегі Борат сияқты сайқымазақтар күл­кі ғып, онымен қоймай келеке-мазақ үшін суретке түсіріп алса ше?!. Жамбыл облысы әкімдігі тілдерді дамыту басқармасының жа­нын­дағы мемлекеттік тілді оқыту орталығының қызметкері А.Бауыр­жанұлы жақында тағы бір өрес­кел­дікті фото нысанаға алыпты. Футболға әуестердің ермегі үшін жасалған доптың бүйіріне... о, тоба, қабырғалы Қазақ елінің Туы бейнеленіпті. Ең биік, ең құрметті орында асқақтап тұруға тиісті қас­терлі рәміздің суреті аяқ ас­ты, шаң үстіндегі допқа бейнеленгенін көріп жағамызды ұстадық. Доп жасайтын фирма­ларға «бә­лен­бай данасын жасап бер» деп тапсырыс беретін кә­сіп­керлер бұл идеясымағымен не айтпақ? Біздің білетініміз, бұл – туған елінің Туына деген құрмет емес. Сөз басында, мемлекеттік Ту – еліміздің ең қастерлі рәмізі, ел Президенті өзін ұлықтауға ар­нал­ған салтанатты сәтте басын иіп, ең алдымен туған мемле­кеті­нің Туын сүйеді дедік. Ендеше, тәуелсіздігінің жиырма жыл­дығын торқалы тойға ұластыр­ға­лы отырған еліміздің ең басты рәміздерінің бірі – мемлекеттік Тудың қадірі мен қасиетіне жете білейік, отандастар! Көсемәлі СӘТТІБАЙҰЛЫ, Жамбыл облысы.