Нақты тапсырмалар берілді

Кеше Ақордада Мемлекет басшысы Нұрсұлтан Назар­баев­тың төрағалығымен Қауіпсіздік Кеңесінің кезекті отырысы өтті. Отырыста дін саласындағы тұрақтылықты нығайтуда одан әрі атқаратын шаралар туралы мәселе қаралды. Президент Әкімшілігінің Басшысы Аслан Мусин баяндама жасады, деп хабарлады Президенттің баспасөз қызметі. Отырыс барысында Мемлекет басшысы тәуелсіздік жылда­рын­да қазақстандықтардың бірлігі­нің, ұлтаралық және конфе­с­сия­­­аралық келісімнің, саяси тұрақ­ты­лықтың арқасында экономика сенімді дамып, азаматтардың өмір сүру деңгейі артқанын, ішкі жал­пы өнім жан басына шақ­­қанда әлемнің жаңа тәуелсіз мем­лекеттерінің арасында ең жоғары көрсеткіштің бірі болып табы­латынын атап өтті. Отырыста, сондай-ақ Қазақ­стан дін ұстану еркіндігін жа­рия­лаған зайырлы мемлекет болып табылатыны, алайда, бұл билік органдары дін саласындағы қа­рым-қатынастарды реттеуден шет­тетілу мүмкіндігін білдірмейтіндігі атап өтілді. Елде діни-экстремистік идеология элемент­те­рін, соның ішінде конституция­лық құрылысты күштеп өзгерту­ге, азаматтардың өмірі мен ден­сау­лығына қатер төндіруге ба­ғыт­­тал­ған ашық акцияларды та­ра­ту­дың бетін қатаң қайтару қажет. Осыған байланысты Мемлекет басшысы құқық қорғау ор­ган­­дары мен өзге мемлекеттік ор­ган­дарға діни-экстремистік көрініс­терді ашу және тез арада әрекет ету жөнінде тапсырма берді. Астана, Алматы қалаларының және облыстардың әкімдері тәрбие және профилактикалық жұмыс­тар­ды күшейтіп, діни бірлес­тік­тердің қолданыстағы заңнама нормаларын қатаң сақтауын қа­дағалаулары қажет. Іс жүзінде ау­қымды міндеттер Дін істері аг­ент­тігіне жүктеледі. Суретті түсіргендер С.БОНДАРЕНКО, Б.ОТАРБАЕВ.