20 мың терек жайқалатын болады

Жиырма жыл аз ба, көп пе? Оны дәл бүгінгі Қазақстанның жү­ріп өткен жолы мен әр са­ладағы қол жеткізген жетістіктері айқындайды. Сол алмағайып тұста Мемлекет басшысының бастамасымен шілдей шашыл­ған қандастарымыз атамекеніне көш керуенін түзеген сәттен бері де екі онжылдық артта қа­лып­ты. Үміттерін үкілеген сол от­ба­сы­ларында дүниеге келген нәресте де жиырманың жалына қол салған. Олар елім деп еміренеді. Қазақстанның тең құқылы аза­маты атанып, оқып білім алуда. Осындай қандастар қат­а­рын­дағы Серікбай Маралбектің Жетісу жеріне келгеніне алты жыл. Ол бабаларының кіндік қаны тамған атажұртқа келісімен бел шешіп еңбек етті. «Маған не бересің?» демеді. Керісінше, ау­ылды гүлдендіруге кірісті. Биыл мерекелі жыл. Демек, оған үлес қосу үшін «20 жыл­дыққа – 20 мың ағаш» деген бастамамен Еңбекшіқазақ ауда­ны Қызылшарық ауылында өз қаржысына 20 мың түп көк терек екті. Алқаптағы қаз-қатар отыр­ғызылған көшеттер қазір жайқалып тұр. Ауыл әкімдігі мен тұрғындар да қолдау білдіріп, көк терек отырғызылған ал­қап­­ты болашақта саябаққа ай­нал­ды­ру жөнінде тұжырымға келген. Тәуелсіз елімнің дамуына үле­сімді қосу азаматтық пары­зым, дейді ол. Жауапкершілікті түсініп, міндетімді ауылды кө­гал­дандырудан бастадым. Кезінде күл-қоқыс үйілген ауыл шетіндегі күресінді тазартып, қо­қыстарды шығарып, жерді тегістеп, 20 мың түп көк терекпен көмкерді. Сүмбіледей түзу жас өскіндерді Қытайдан арнайы әке­ліпті. – Отырғызылған жас теректерді Қытайдан арнайы кәдімгі қол дорбаға салып әкелдім. Жол­да кеденшілер тоқтатып, мына «отынды» қайда апара жатыр­сың, деді. Мен оларға елімді гүл­дендірейін деген ниетімді айттым. Онда еңбегіңіз жансын деген ниеттерін қосты. Мына жайқалған ағаш саны 20 мыңнан да көп, – дейді Қызылшарық ауы­лының тұрғыны Серікбай. Теректі өсірудің де өзіндік қыр-сыры бар. Мәселен, қаулай өскен  жапырақтарын жұлып, та­мыр алуына мүмкіндік беру керек. Қытайдан жеткізілгенде бірер қарыс көшеттер күтіп баптап, дәрілегеннің арқасында үш жылда биіктеп, кәдімгі терекке айналыпты. Жасыл желек жа­пы­рақ жайған. Көлеңкесі де едәуір. Балалар арасында асыр салып ойнауда. Қандасымыздың бұл игілікті ісі ел тәуелсіздігінің 20 жылдығына арналған жеке сыйы екенін шын ниетпен қабылдауда. «Жалғыз ағаш орман емес, жал­­­ғыз адам қорған емес» деген ғой. Серікбайдың бастамасын ауыл әкі­мі мен ауылдастары жал­ғас­тырып әкет­­ті. Өйткені, бола­шақ­та жастар мен қарттар осында келіп, кө­лең­кесінде бос уақытын өткізіп, демалса, ри­за­шылығын білдірсе бұ­дан артық қуа­ныш жоқ. Сондай-ақ, ел мерейіне тар­туды ағаш өсіруден баста­ға­нын бәрі де нәтижелі іс деп бағалауда. Туған жерді, елімізді көркейту, сол жолда тер төгу бәрімізге ор­тақ міндет. Серікбайға риза бо­лып, оған қолдау көрсетіп, үле­сі­мізді қосайық деп отырмыз, дейді Қызылшарық ауылының тұрғыны Емберген Жексенов. Ауыл әкімдігі мен кәсіпкерлер қарап қалған жоқ. Енді олар 20 мың түп ағаш отырғызылған жерді сая­­баққа айналдыру үшін іске кіріскен. Халық демалатын орын­дық­тар мен күнқағар орнату, тағы басқа шаралар қолға алынбақшы. Тәуел­сіз­дік­тің 20 жылдығына  20 мың түп ағашты бір өзі еккен Серікбай келер жылы тағы да ос­ын­шама ағаш кө­шеттерін отырғызуды жоспарлаған. Күмісжан БАЙЖАН, Алматы облысы.