30-31 шілдеде Астанадағы «Метро» сауда орталығының аумағында Ауыл шаруашылығы министрлігі, Астана қаласының әкімдігі және «ҚазАгро» ұлттық басқарушы холдингі» АҚ-тың ресми қолдауымен бесінші рет еліміздің агроөнеркәсіптік жетістіктерінің «Қараөткел- 2011» республикалық жәрмеңкесі болып өтті. Дәстүрге сай республиканың барлық аймақтарынан келген кәсіпкерлер мен шаруа қожалықтары елорда тұрғындары мен қонақтарына өз тауарларын ұсынды.
Малмен көзін ашқан қазақ үшін мұнда жиналған жұртшылықты алғашқы кезекте қызықтырғаны, әрине, төрт түліктің түрлері еді. Еліміздің барлық аймақтарынан дерлік әкелінген асыл тұқымды малдар түрі өте көп болды. Астана іргесіндегі Қосшы ауылынан орын тепкен «Асыл түлік» АҚ базасында өсірілген мүйізді ірі қаралар мен Семейдің «Гүл-Райхан» шаруа қожалығынан келген шопан ата төлдері қараған жанның қызығушылығын тудырмай қоймайды. Сондай-ақ, асыл тұқымды етті бағыттағы жылқылар да жәрмеңкеге келгендердің назарын өздеріне аудара берді. Мұнан өзге үй құстарының бір тобы да жәрмеңке сөресінен орын алыпты.
Аты айтып тұрғандай, ауылшаруашылық жәрмеңкесі болған соң мұнда өндірілетін өнім түрлері де назардан тыс қалмайтындығы белгілі. Бұл ретте Жамбыл облысы, Жамбыл ауданы, Гродеково ауылынан ат арылтып келген жеке кәсіпкер Еркінбек Тоққұловтың ұсынған сүт өнімдерінен жасалған тағамдарын айтқан жөн. Кәсіпкер жеті адамды жұмыспен қамтыса, орташа жалақы 20 мың теңгені құрайды екен. Облысқа бағытталған өнімдері қазіргі күндері тұтынушылар тарапынан жылы бағалар алып жатқанға ұқсайды. Ауылдық жерде тұрып, тұрғындарды жұмыспен қамтуда жұмыс жасап жатқан кәсіпкерге алғыстан басқа айтар жоқ. Ал Тараз қаласындағы «Дәнегүл» ЖШС сүт өнімдері, соның ішінде, қоюланған сүт өнімдерімен айналысса, кәсіпорында отыздан астам адам жұмыспен қамтылған. Тауарларының жылдық айналымы 59 млн. теңгені құрайды.
Диқандықпен айналысатын ауыл халқы үшін ауадай қажет техниканың көптеген түрі де осында көрініс тапқан. «Агромаш Холдинг» АҚ ұсынған аталмыш техникалар шаруашылықтың барлық түріне қызмет етуге даяр тұр. Әлемнің бірқатар елдерімен әріптестік байланыс орнатқан компанияның қызметі қашанда халыққа әзір екені жәрмеңкені аралағанда анық байқалды. Сонымен қатар, Атырау облысынан келген «Амангелді» өндірістік кооперативі өнімдерінің барлық жағынан халыққа ыңғайлап жасалғаны да ешкімді бей-жай қалдырмады.
«Қараөткел-2011» жәрмеңкесі аясында II Халықаралық «KazMeat&Milk-2011» мал шаруашылығы форумы өтсе, Ауыл шаруашылығы министрлігі өкілдері мен тәуелсіз сарапшылар тарапынан үздік ауылшаруашылық тауар өндірушілері анықталды. Жәрмеңкеге қатысушылардың үздіктері ұйымдастыру алқасының атынан «Қараөткел-2011» алтын медалімен марапатталды. Осылайша жәрмеңке сарапшылар мен агрокәсіпорындардың тәжірибе алмасуларына мүмкіндіктер беріп, ауылшаруашылық өнімдерінің бәсекелестікке қабілеттілігін арттыруға, сондай-ақ, өнім өндірушілер мен сауда желілерінің іскерлік байланыстарын орнатуға өзіндік серпін берді.
Әбдірахман ҚЫДЫРБЕК, Суреттерді түсірген Ағыбай АЯПБЕРГЕНОВ.
