Әскери техника шеруге дайын

Кеше Қорғаныс министрлігінің ұйымдастыруымен Астананың іргесіндегі локомотив депосының жанында Тәуелсіздіктің 20 жылдығы және Конституция күніне арналған әскери шеру дайындығының таныстырылымы өтті. Астана төңірегіндегі бұл аймақта салтанатты әскери марштардың, әскери техниканың дауысы естіліп, командирлік пәрмендердің беріліп жатқанына бір айға жуық уақыт өтті. Өздеріңіз білетіндей, соңғы екі жылдағы Конституция күнін елордамыз ерекше дайындықпен атап өтуді дәстүрге айналдырып келеді. Бұл жылы да солай болмақ. Себебі, биылғы жыл – Тәуелсіздіктің 20 жылдығы. Конституция күні барша қазақ­стан­дықтар Отан қорғаушыларымыздың сап түзеп, әскери шерумен халық алдында жүріп өткенін ғана тамашалап қоймай, ел әскерінің техникалық қуатына да куә болмақ. Естеріңізге сала кетейік, өткен жылы механикаландырылған лектің па­радтық есептобын 150-ден аса жауын­герлік техника құраған болатын. Ал биыл­ғы жылы олардың саны артып, елі­міздің бас алаңынан 250-ден астам әс­кери техника жүріп өтетін болады. Елорда көшелері бұл ауыр техникалардан ешбір зардап шекпейді. Өйткені, бұл жолы да танктер, БМП-лар мен МТЛБ-лар шынжыр табандарына резеңке «тәпіш­ке­лер» киген екен. 30 тамыз күні Астана жұрт­шылығы Тәуелсіздік сарайы­ның ал­дынан механикаландырылған лектен әуе шабуылына қарсы қорғаныс әс­кер­лерінің «Стрела-10», «С-300», «С-200», «С-125», сондай-ақ «С-75» сынды заманауи қару­ларын да көретін болады. Одан өзге, әс­кери парадқа «Найза», «Акация», «Мста», «Тюльпан», «Смерч», «Рапира», «Штурм», «Град», «Ураган» сияқ­ты орудиялар мен кешендер, Д-30 гауби­цасы қатысады. Бұл топты «Ланд Ровер», «Хаммер» сынды автотехникалар толық­тырмақ. Механикаландырылған лектің биыл­ғы жылғы тағы бір жаңалығы танктерге қолдау көрсететін жауынгерлік машиналар, ауыр оқ ататын жүйелер және жетілдірілген БТР-82 әскери техникасы болмақ. Бұл ретте Қорғаныс министрінің қару-жарақ жөніндегі орынбасары, генерал майор Аман­жол Оспанов: «Әскери шеруге жал­пы 139 ауыр техника жұмылдырылып отыр. Одан өзге 20-ға жуық техника резервте сақтаулы. Десек те, осы күнге дейінгі дайындығымызда олардың ешбірі сыр бермей, өз қызметтерін ойдағыдай ат­қаруда», – деп әскери ауыр техникалардың дайындығына оң бағасын берді. Есептоптар, әскери техниканың белгіленген уақыттары, экипаждар әр қимыл­дарын сауатты орындады. Олардың ара-қашықтығындағы әрбір өлшемдері есеп­теу­лі екендігі анық байқалып тұрды. Бұл шеруде еліміздің әскери қызметшілері өз­дері­нің саптық дайындығын толықтай өз дең­гейін­де орындайтынына, әрбір қимы­лы­­ның орынды қозғалатынына сенім мол. Се­бебі, жауынгерлік дайындықтар қазірдің өзінде өз нәтижесін беріп отыр. Оларды көрген басшылық дайындық өте жақсы деген тоқтамға келді. Жұлдыз БАЙДІЛДА.