Мұсылман елдері Сомалиге қол созды

Үстіміздегі жылдың 28 шілдесінде Түркияның Ыстамбұл қаласында ИЫҰ Бас хатшысының бастамасымен Сомалидегі ахуалды қарау мақсатында Ислам гуманитарлық ұйымдары мен қорлары өкілдерінің кездесуі өткен болатын. Кездесуде Сомалиге және ислам әлемінің өзге де мұқтаж елдеріне көмек көрсету үшін ИЫҰ-ның гуманитарлық коалициясын құру туралы шешім қабылданған еді. Коалицияның құрылуына ИЫҰ-ның қазіргі сәтте Сомалиге тікелей елде гуманитарлық көмек бере алатын бірден-бір ұйым екендігі себепкер болды. «Әл Ша­баб» әскери құрылымы өзде­рі­нің қол астындағы аумаққа мұ­сылман емес гуманитарлық ұй­ым­дардың енуіне жол бермей отыр. БҰҰ агенттігі мен батыс­тық қайырым­дылық қорлары мұн­дай жағдайда Сомалиден шық­қан босқындарға көмекті көрші елдерде, атап айт­қанда, уақытша босқындар лагері орналасқан Кенияда ғана көр­се­тумен шектелуге мәжбүр болып отыр. Мұсылман қорлары сарапшы­ла­рының далалық миссиялары­ның бағалауынша, қазіргі уақыт­та Сомалиде 3 миллионнан астам адамға аштық ажалы төніп тұр. Кездесуге қатысушылар ИЫҰ-ның таяудағы 3 айға арналған шұ­ғыл гуманитарлық көмегінің бюджетін 29 млн. доллар деп белгіледі. Қазіргі кезде Сомалиге Сауд Арабиясы 60 млн. доллар, Түр­кия 37,7 млн. доллар (көмек), Иран 25 млн. доллар, Кувейт 10 млн. доллар және Судан 100 мың доллар көмек беретіндіктерін мәлімдеді. Ыстамбұл кездесуінің қоры­тын­ды декларациясында ИЫҰ-ға мүше мемлекеттерге Рамазан айы кезеңінде Сомалиге және гума­ни­тарлық дағдарысты бастан кешіп жатқан ИЫҰ-ның өзге де елдеріне қайырымдылық көмек көр­се­ту­ге бастамашы болуға үндеу тасталған. 17 тамыз күні Ыстамбұл қа­ла­сында ИЫҰ Атқару комитетінің Сомалидегі гуманитарлық дағда­рыс­қа және ИЫҰ қолдауымен оны тез арада жоюға бағытталған бірлескен іс-шараларға арналған шұ­ғыл министрлік отырысы болып өтті. ИЫҰ СІМК Төрағасы – ҚР Сыртқы істер министрі Е.Қазы­хановтың төрағалығымен өткен оты­рысқа Сомали Президенті Ш.Ахмед, Түркия Премьер-министрі Р.Эр­до­ған, ИЫҰ Бас хат­шысы Э.Их­сан­оғлу, Ұйымға мү­ше мемлекеттер министрлері қатысты. ИЫҰ Сомалиге неғұрлым көкейкесті 4 проблеманы – азық-түлік қауіпсіздігін қамтамасыз ету, денсаулық сақтау, ауыз су және экономиканы шұғыл қалпы­на келтіруге бағытталған 150 млн. АҚШ доллары көлеміндегі арнайы көмек бағдарламасын әзірледі. Кездесу нәтижесінде Атқару комитетінің отырысына қатысу­шы­лар Қорытынды коммюнике қабылдады. Ыстамбұл кездесуі Сомалиге ИЫҰ-ға мүше мемлекеттер тарапынан гуманитарлық және қаржылық көмекті айтар­лық­тай дәрежеде жұмылдыруға жағдай жасап, Ұйымның Арнау­лы көмек бағдарламасын ресурстармен қамтамасыз етеді деп күтілуде. Өз кезегінде Қазақстан өзінің ИЫҰ СІМК-ге төрағалығын ескере отырып және барлық мұсылмандар үшін қасиетті Рамазан айында Сомали халқына гуманитарлық көмек ретінде 500 мың АҚШ долларын бөлу жөнінде шешім қабылдады. «Егемен-ақпарат».