Иық теңестіріп, тізе қосып...

«Іле» оқу орталығында «Дала қыраны – 2011» халықаралық тактикалық-арнайы бітімгерлік оқу-жаттығулары аяқталды. 8-18 тамыз аралығында өткізіл­ген бұл жаттығуларға 1400-ден астам әскери қызметші, жүзге жуық жауынгерлік және арнайы техника, сондай-ақ әскери-көліктік авиация қатыстырылды. Салтанатты шараға қатысқан Қорғаныс министрінің бірінші орынбасары – Қорғаныс министрлігі Штабтар бастықтары ко­митетінің төрағасы генерал-полковник Сәкен Жасұзақов өз сө­зінде америкалық және бри­тан­дық әскерилердің қатысуымен «Дала қыраны» көпұлтты бітімгерлік жаттығуларын өткізу жақ­сы дәс­түрге ай­налғанын, ал қазақ­стандық әскери қыз­метшілер екі апта бойы шетелдік әріп­тестерімен ты­ғыз қарым-қатынас ор­на­тып, тап­сырма­лар­ды сауатты орын­дай ал­ғанын атап өтті. Биыл­ғы жылы жа­т­тығуға қатысушылар саны артып, оған Қыр­ғыз Респуб­лика­сы мен Лит­ва әскери қыз­мет­шілері қосылып отыр. Бұл «Дала қыра­нының» үлкен әлеуетке ие екендігін және оның ауқымы одан әрі де ұлғая түсетінін көрсетеді. Бұл пікірді жаттығуға қатысқан елдер­дің елшілері мен құрметті қонақ­тар да бір ауыздан құптады. Оқу-жаттығуға қатысушылар қазақстандық әріптестеріне жүк­телген тапсырмаларды иық те­ңестіре жүріп, сәтті орындаған­дықтары үшін алғыстарын жеткізуде. Өзара іс-қимылдар бары­сындағы ұйымшылдық, достық – осының бәрі олардың жұмы­сына өз септігін тигізгені анық. «Дала қыраны – 2011» халықаралық тактикалық-ар­найы бітімгерлік оқу-жаттығу­ларының жабылуы салтанатты маршпен және жаттығуларда ерек­­шеленген әскери қыз­мет­шілерді марапаттаумен аяқ­тал­ды. Олар грамоталармен, медальдармен және сыйкәде­лер­мен көтермеленді. Оксана ПАРПУРА, Қорғаныс министрлігі баспасөз қызметінің қызметкері. Суретті түсірген  Ермек САРБАСОВ.