Намысты ұлдарымыз мол болғай!

Көпшілік біздің Жаңажолды  «балуандар ауылы» ретінде жақсы біледі. Бұл дәстүр әлі күнге дейін үзілген емес. Ұлттық спорт түрлері бойынша  балалар мен жасөспірімдер мектебінің /ҰСБЖМ/ филиалы ашылғалы  ұлттық өнерімізді серік етушілер қатары  өсе түсті. Қазір онда  40-қа тарта балғын  жаттығады.  Бұ­рындары ауылдағы жиын-тойлар ойын-сауықсыз өтпейтін. Күрес десе, екі білегін сыбанып, ішкен асын жерге қоятын қара­домалақ балалар көк майсаны  күрес ала­ңы­на айналдыратын. «Күш атасын таны­мас» демекші,  әдіс-тәсілі асқандар қар­сы­ластарын алып та, шалып та жығатын. Зәузәт, Жанатай Шоткиндер, Сәрсенбек Ожықаев, Игілік Әбдіраханов, Айдар Қалижанов секілді  жаңажолдық балалар осылай шынығып өсіп, кейін үлкендер сапында да намыс­ты туын жоғары ұстады.  Менің қайным Ерік те  күреспен айналы­сып, балам Батырхан оған еліктеп өсті. Бұл күні шалақындықтар баламды оқушылар арасында Қызылжар өңірінен топ жарған тұңғыш ел чемпионы ретінде мақтан тұтады. Бұл орайда, Батырханды  қазақ күресінің қыр-сырына талмай үйрет­кен  жаттықтырушы Болат Нұрта­зинге деген алғысым шексіз. 5 жылдың ішінде  талай  биік асуларды бағынды­руы­на зор үлес қосты. Мектеп оқушы­лары арасында ай­мақ­тық жарыстарда бірнеше рет жеңімпаз атанып, облыстық құрамаға қабылданды. 2009 жылы рес­публикалық додада алғаш рет тұсауы кесілді. Петропавл қаласында өткен ел чемпионатына 300-ге жуық бал­ғын балуан қатысып,  балам 57 кило сал­мақ дәре­жесі бойынша жүлделі екінші орын­­ға көтерілді. Келесі жылы  дода Қызыл­орда қаласында көк байрағын желбіретіп, онда үшінші орынды жеңіп алды. Биыл Көкшетау қаласында өте тартысты өткен бәсекеде  барлық қарсыластарын ұтып, жеңістің ең биік тұғырына көтерілді. Батырхан биыл Алматыдағы  дене тәрбиесі академиясына оқуға түсіп, бұдан да биік асуларға жетуді асыл мақсат етіп отыр. Сөз арасында оның  кү­рес­пен түбе­гейлі айналысып, байрақ­ты жарыстарға қатысуына мүмкіндік ту­дырған, қаржылай көмектескен азамат­тарға деген риза­шы­лығымды білдіре кеткім келеді.  ҰСБЖМ директоры Есләм­бек Бекмұрзин, облыстық күрес қауым­дастығының төрағасы Бауыр­жан Құл­жанов секілді азаматтардың ша­рапаты мол тиді. Аудандық әкімдік, спорт және туризм басқармасы да талай рет демеушілік көрсетті. Қайным Ерік қолынан жетелеп, үлкенді-кішілі бәйгелердің бірде-біреуінен қалдырған жоқ. Жыл өткен сайын елімізде  спортпен шұғылданып, саламатты өмір салтына ұмтылушылар қа­та­ры өсіп келеді. Оған Елбасының Жолдауы ерекше серпін берді. Осыдан 37 жыл бұрын  Бауыржан ағасы  қазақ күресінен ел жеңімпазы болса,  осынша уақыттан кейін мұндай бақыт менің балама бұйырды.  Ауылдан шыққан қазақтың ұл-қыздары әлемдік деңгейде қазақ елінің мәртебесін тасытып, намысын қорғап жатса, бұдан асқан қуаныш жоқ. Аналық тілегім бұл! Балғын ЖАҒЫПАРОВА. Солтүстік Қазақстан облысы, Шал ақын ауданы, Жаңажол ауылы.