Сыр елінде туылған өрен әскери саладағы қадамын 2001 жылы Шымкент қаласындағы республикалық әскери мектеп-интернатта оқудан бастайды. Екі жылдан соң Түркиядағы әскери-теңіз училищесіне қабылданып, оның қабырғасынан бес жылдан соң «Кеме құрылысы инженері» мамандығын алып шығады. Арман қуалаған жас одан әрі Түрік еліндегі оқу орындары мен кемелерде біліктілік көтеру мақсатында курстардан өтеді. Елге оралған әскери маман «Өжет» шағын күзет кемесіне электрмеханикалық-жауынгерлік бөлімге командир болып тағайындалады да, артынша 21814 әскери бөлімі командирінің электр механика бөлімі бойынша орынбасары болып қызметке кіріседі. Жұмысқа жауапты жас көп ұзамай электр механикалық қызметтің аға офицері ретінде кемелерге қызмет көрсету, құру және жобалау-жасақтау жұмыстарымен айналысады.
– Қызмет мені қызықтыра түскенін ұқтым да одан әрі білім алып, білігімді тереңдете түсу керек деп шештім. Осы оймен Түркиядағы Әскери-теңіз күштері академиясына әскерді әкімшілік басқару мамандығы бойынша оқуға түстім. Содан кейін суда іздестіру және іздеу-құтқару қызметінің бастығы болып тағайындалдым.
Әскерде қызмет ету әрбір ер адамның парызы деп білемін. Рас, 90-шы жылдардағы дағдарыс келмеске кетіп, қазір әскери сала қайта өз биігіне көтерілді деп ойлаймын. Оның себебі, еліміз дағдарыстан шықты, әскерилерге жақсы жағдай жасалды, саламыз аяғынан тұрды. Енді Отанымызды дамыту, қорғау – біздің міндетіміз, – дейді С.Дастан.
Қай қызметте де өзін ұйымдастыру қабілетінің жоғарылығымен таныта білген Самат қазір 29011 әскери бөлімі оқу орталығының бастығы. Оқу орны – еліміздегі Қазақстан Республикасы Қаурлы Күштері Әскери-теңіз күштері құрамына кіші басшылық құрам және теңіз мамандарын дайындаумен айналысатын бірден-бір оқу орны. Алғашында орталық әскер қатарында әртүрлі жағдайлармен қызмет ете алмаған 27 мен 32 жас аралығындағы жігіттерді қабылдап, оларды Қарулы Күштердің танк және мотоатқыштар бөлімшелеріне дайындаумен шұғылданды. Олар әскери алаңдарда болып, қарумен жұмыс жасап үйренді, әскери техникалармен танысты және ұрыс кезінде әртүрлі жағдайларға дайын болу жолдарын үйренді. Үш жыл ішінде оқу орталығында Маңғыстау, Атырау, Ақтөбе, Батыс Қазақстан өңірлерінен келген 700 жігіт атқыш, пулеметші, граната лақтыру салалары бойынша оқып шықты.
Келісімшарт бойынша жұмыс істеушілер кіші кеме қызметкері мамандығы бойынша дайындықтан өтеді және қызметке тағайындалады. Бұл тұрғыда орталық еліміздің Қарулы Күштері құрамын көбейту және жастарды жұмыспен қамту сияқты екі бірдей бағытты қатар жүзеге асырып келеді.
Отбасында екі бала тәрбиелеп отырған Самат Алматұлының болашаққа сенімі мол. Қазақ, орыс тілдерімен бірге түрік және ағылшын тілдерін меңгерген ол әлем елдерімен тәжірибе алмаса алу үшін бірнеше тіл білгенді жөн санайды. Самат сөз соңында қазақ жастарының елімізді қорғау үшін білімді, шыныққан шымыр болуы қажеттігін маңызды деп білетіндігін жеткізді.
Гүлайым ШЫНТЕМІРҚЫЗЫ,
«Егемен Қазақстан»
Маңғыстау облысы
