Қорғаныс және аэроғарыш өнеркәсібі вице-министрі Марат Нұрғожиннің төрағалығымен жоғары технологияларды қолдана отырып, Қазақстан Республикасы Қарулы Күштерінің бөлімдері мен жеке құрамының жауынгерлік керек-жарағын жасақтау жөнінде бағдарлама әзірлеу мәселесі бойынша мәжіліс өткен болатын. Іс-шараға Қорғаныс, Ішкі істер министрліктерінің және «Қазақстан Инжиниринг» ҰК» АҚ-тың өкілдері де қатысты.
Қазіргі уақытта «Болашақ сарбазы» үлгісіндегі керек-жарақ жиынтығына әлемнің 50-ден астам елінің армиясы ие болғанын атап өткен жөн. Мәселен, Ресейде қорғаудың заманауи құралдары кешенін, байланыс, бақылау және көздеу, қару-жарақ және оқ-дәрі құралдары кешенін білдіретін «Ратник» жауынгерлік жиынтығымен Қарулы Күштерді жабдықтау жөніндегі жұмыстар жүргізілуде. Осы жиынтық жауынгерлік тиімділік пен ұрыс алаңында жеке солдаттың тірі қалуын едәуір арттыруға мүмкіндік береді.
«Біз уақыттың ағымынан қалмай, ғылым мен техника саласындағы соңғы жетістіктерді пайдалану есебінен әскери қызметшілердің тиімділігін арттыруға арналған өзіміздің бағдарлама қажет деп есептейміз. Бұл ретте, біз өзіміздің отандық кәсіпорындардың әлеуетін барынша ұтымды пайдалануымыз қажет», − деп атап өтті вице-министр.
