Мерекелік жиынға Парламент Мәжілісінің депутаты Сауытбек Абдрахманов, қалалық білім басқармасы басшысының міндетін атқарушы Әнуар Жанғозин, осы мектепте білім алған түлектер, ардагер ұстаздар мен ата-аналар қатысып, жылы лебіздерін білдірді.
Мерейтойлық жиынға қатысушылар алдымен мектеп тарихынан сыр шертетін мұражайды және оқушылар шығармашылығына арналған білім көрмесін тамашалаудан басталды. Сондай-ақ, мектеп ауласында қазақ күресі, каратэ-до, тоғызқұмалақтан спорттық сайыстар өтті.
Жыр алыбы Жамбыл Жабаевтың есімімен аталатын білім ошағында тұрақты түрде ақындар айтысын өткізіп тұру бұл мектептің дәстүріне айналған десек те болады. Осы жолы да мектептің түлегі Сырым Әуесхан секілді бірнеше республикалық ақындар айтысының жүлдегерлері мен оқушылардан құралған ақындардың 4 жұбы өнер көрсетті. Шара соңы Маржан Арапбаева бастаған эстрада жұлдыздарының орындауындағы концерттік бағдарламамен жалғасын тапты.
Алмас МАНАП,
«Егемен Қазақстан»
