– Нұрлыбек Мейірханұлы, Ақтөбе аймағында бұқаралық спорттың жай-күйі қандай деңгейде?
– Облыста денешынықтырумен және спортпен тұрақты шұғылданушылар саны жылдан-жылға өсіп келеді. Өңірде тұратын халықтың санына шаққанда өткен жылы бұл дерек 27 пайызды құрады. Салыстырмалы түрде алғанда, мұның өзі оң көрсеткіш деуге болады. Сүйегі қатып кеткен ересектерден гөрі балалар мен жасөспірімдердің спортпен айналысуының маңызы ерекшелеу. Қазіргі күні спортты серік еткен еркін елдің ертеңгі өкілдерінің саны 17 мыңға жетіп отыр. Оның 6 мыңға жуығы ауылдық жерде. Алдағы мақсатымыз – жоғарыда көрсетілген көрсеткішті 30 пайызға жеткізіп, халықтың бұқаралық спортқа кеңінен тартылуына жағдай туғызу.
– Облыс орталығындағы қазіргі спорттық нысандар халықаралық деңгейдегі ірі жарыстар өткізуге сәйкес келмейді деген ой-пікірлер де айтылып қалып жүр. Бұған не дейсіз?
– Бір есептен мұны мүлдем жоққа шығаруға бола қоймас. Дегенмен, кейінгі кезде халықаралық стандарттар мен ережелерге сай келетін әмбебап спорттық құрылымдар бой көтеріп үлгергені де шындық. Мұның бірі – Ақтөбе қаласындағы 400 орындық хоккей модулі. Қазір тамаша құрылыс кешені аяқталып келеді. Аталған спорттық нысан шайбалы хоккей, шорт-трек, мәнерлеп сырғанау секілді қысқы спорт түрлерін дамытуға мол септігін тигізбек. Сондай-ақ, жекпе-жек, күрес сарайы да биыл пайдалануға беріледі деп күтілуде. Тағы бір жағымды жаңалық, таяуда облыс орталығында мемлекет-жекеменшік әріптестігі аясында 2700 орындық көпбейінді мұз спорт сарайының алғашқы қазығы қағылмақ. Жоғарыда берген сауалыңызға қайтарған жауабымда айтып кеткенімдей, бұл нысандар пайдалануға берілген кезде 2020 жылға дейін тұрғындардың 30 пайызының спортпен тұрақты түрде шұғылдануына мүмкіндік тумақ. Сонымен бірге, халықаралық деңгейдегі ірі жарыстардың өткізілуіне де қолайлы жағдайлар жасалмақ.
– Бүгінгі күнге дейін облыс орталығындағы екі стадионның да футболдан кездесу өткізуге сәйкес болмай келгенін немен түсіндіресіз? Соның салдарынан «Ақтөбе» футбол клубы өз алаңына қарсыластарын шақыра алмай келді емес пе? Бұл стадиондардың кем-кетігі қашан түгенделмек?
– Иә, облыс орталығында екі ойынның өтпей қалғаны рас. Мұнда республикалық футбол федерациясы мамандары қосымша стадионның жасыл алаңы кәсіби клубтар ойнайтын стандарттарға сәйкес келмейді деп шешім шығарған болатын. Дегенмен, бұл мәселе «Ақтөбенің» турнирдегі ойын кестесін жүргізуіне кедергі келтірген жоқ. Өйткені, федерация келісіміне сәйкес сәуірдің аяғында ойналатын екі ойын жаз айындағы маусымдық ойындарға көшірілді.
Енді орталық стадионның жай-күйіне келсек, «Ақтөбенің» мамыр айында өз алаңында ойнауына толық мүмкіндігі бар. Мұнда да федерация мамандары тиісті тексерулер жүргізді. Олар оның қорытындысына сәйкес, өңірде ұзаққа созылған қыстан кейінгі алаңның жай-күйі қазіргі жағдайда техникалық талаптарға сәйкес келмейді деп тапты. Яғни, мұны реттеу үшін қосымша уақыт қажет болды. Дегенмен, қазір бұл жағдай толығымен қалпына келтірілді.
– Бүгінге дейін еліміздің көптеген өңірлерінен Олимпиада жеңімпаздары мен жүлдегерлері шығып үлгерді. Ал әзірге Ақтөбеден Олимпиадада ел туын желбірететін спортшылардың шығатын түрі көрінбейді. Жергілікті спорт ведомствосының басшысы ретінде бұл мәселе сізді ойландыра ма?
– Олимпиада резервтерін дайындаудың бір көзі – спорттағы дарынды балаларға арналған мектеп-интернаттар. Бұрын өңірде мұндай арнаулы мектеп құрылмаған еді. Бұл көкейкесті мәселе тек өткен жылы ғана өз шешімін тауып, жаңа нысан біздің басқарманың құзырына берілді. Қазіргі кезде оған колледж мәртебесін беру жолдары қарастырылуда. Спорттағы дарынды балаларға арналған оқу орны базасын одан әрі жақсарту үшін қазір мұнда спорттық кешен және жеңіл атлетикаға арналған жүгіру жолдары салынуда. Оның тәрбиеленушілерінің арасынан Олимпиада саңлақтары шығады деген үлкен үмітіміз бар. Мұның бер жағында алдағы Токио Олимпиадасында көк байрағымызды көкке желбіретеді деп үкілеп жүрген спортшыларымыз да жоқ емес.
– Облыстың шалғай аудандарында денешынықтыру және спорт кешендерінің бой көтеруі немесе құрылысының салынуы туралы не айтасыз? Бұл жөнінде қандай жобалар бар?
– Өңірде таяудағы жылдарда барлық аудандарда денешынықтыру-сауықтыру кешендері құрылыстарын салып, аяқтау белгіленген. Бұл шаруа кезең-кезеңімен іске асырылмақ. Мұғалжар және Темір, Байғанин секілді шалғайдағы аудандарда бұл істі «Самұрық-Қазынаның» қолдауымен тұрғызу мүмкіндіктері қарастырылуда. Облыста халық саны жылдан жылға өсіп келеді. Біз осы оң әлеуметтік-демографиялық ахуалды ескере отырып, арнайы іс-шаралар жоспарын жасадық. Соған сәйкес көп салалы спорт ғимараттары мен алаңдарының құрылымдары жобаланды. Бұл мәселе сұхбатымыздың басында айтылғандай, бұқаралық спортты дамытуға да ыңғайлы болмақ. Өйткені, мұндай үлгідегі спорттық нысандар бірінші кезекте көпшіліктің баскетбол, волейбол, шағын футбол, хоккей және теннис спорты түрлерінен жергілікті деңгейде жарыстар өткізуіне арналған.
– Ақтөбе аймағы үшін басым спорт түрі қайсысы екенін айта аласыз ба?
– Бұл сұрағыңызға екі түрлі түйін мен көзқарас тұрғысынан келуге болады. Біріншіден, қай кезде де басым бағыт – Олимпиялық спорт түрлерін дамыту болып танылатындығы. Жаңа да айтып кеттім ғой, қазір біз бұл мәселеге барынша кең жағдай туғызуға бағыт ұстанып отырмыз. Ал мәселенің екінші бір қырынан келгенде, қазіргі таңда өңірде шаңғы, грек-рим, еркін күрес, каратэ, жүзу, таэквандо секілді спорт түрлері жақсы дамып келеді. Қазіргі мақсатымыз – ел өңірлері қатарындағы спорт саласы көшінің алдыңғы легінен көріне білу. Бұған біздің күш-қуатымыз жетеді. Өйткені, бүгінгі күнде Ақтөбе спортының ахуалы ойдағыдай деп нық сеніммен айтуға болады.
– Әңгімеңізге рахмет.
Әңгімелескен Темір ҚҰСАЙЫН,
«Егемен Қазақстан»
АҚТӨБЕ
