Алғашқы раундтан ширақ қимылдап, жойқын соққыларын дөп тигізген жерлесіміздің басымдығы бірден байқалды. Күшін үнемдеп, мейлінше артық қимыл-қозғалыстарға бой алдырмаған Арманның жоғары шеберлігі көзге ұрып тұрды. Дегенмен, бұған дейін нокаутпен жеңіліп көрмеген жапон спортшысы табандылық танытып, сәті түскен сәтте қарсы шабуылдарын жасап бақты.
Қазақстандық спортшы екінші раундта да қарсыласына қысым көрсетуін тоқтатпады. Шабуылын үдете берген ол бұрышқа тақалған жапондықты айналып теуіп, нокаутқа түсірді.
Айта кетейік, Арман Оспанов жауынгерлік самбодан үш дүркін әлем чемпионы. Бұған дейін аралас жекпе-жектен ММА турнирінде 7 кездесу өткізіп, барлығында жеңіске жеткен, 5-еуін мерзімінен бұрын аяқтаған. Биыл қазақстандық ACB лигасымен 4 жекпе-жекке келісімшарт жасасып, соның алғашқысында жеңіске жетіп отыр.
