Дүниежүзілік экономикалық форумның Жаһандық бәсекеге қабілеттілік индексі аясындағы инновацияны дамыту деңгейін анықтайтын негізгі индикаторлар технологиялық дайындық және инновациялық әлеует болып табылады. Аталған индикаторлар соңғы жылдары оң динамика көрсетіп отыр. «Технологиялық дайындық» индикаторы 5-тармаққа – 61-орыннан 56-орынға және «Инновациялық әлеует» 13-тармаққа – 72-орыннан 59-орынға жақсарды. Аталған индикаторлардың жақсаруы жүргізілген үдемелі индустриялық саясатпен байланысты, оның аясында жаңа жобалармен бірге жаңа технологиялар келеді», деді ведомствоның Технологиялық және инновациялық даму департаменті директорының орынбасары Несіпгүл Есембаева.
Бүкіләлемдік интеллектуалды меншік ұйымымен бірлесіп «INSEAD» француз бизнес-мектебі, Корнель университеті әзірлеген Инновацияның жаһандық индексі рейтингінде де Қазақстан өз орнын жақсартқан. Н.Есембаеваның айтуынша, ҮИИДМБ басталғанға дейін инновациялық белсенділік 4 пайыз болса, 2016 жылы екі еседен артық өсіп, қазіргі уақытта 9,3 пайызды құрап отыр. «Инновациялық қаржыландыру жыл сайын артып келеді. 2015 жылмен салыстырғанда технологиялық инновацияларға бөлінген қаржы екі еседен асты. Бұл инновациялық өнім көлемінің өсуіне оң әсер етіп отыр. 2015 жылы инновациялық өнімдер көлемі 377 млрд теңгені құраса, 2016 жылы аталған көрсеткіш 20 пайызға өсіп, 445,8 млрд теңгеге жетті», деді департамент өкілі.
