Қызылорда облысында әлеуметтік нысандар ашылды

Тәуелсіздіктің 25 жылдығына орай Қызылорда облысы, Қармақшы ауданының Жосалы кентінде облыс әкімі Қырымбек Көшербаевтың қатысуымен аймақтық-өлкетану мұражайы мен оқушылар үйінің ашылу салтанаты өтті. Облыс әкімі  алдымен аймақтық-өлкетану мұражайының жаңа экспозициялық залдарымен, сонымен қатар заманауи кітапханамен танысты. Мұражайдың екінші қабатындағы екі үлкен зал өңір тарихына және оның тәуелсіздік жылдарындағы дамуына арналған. Мұражайда Қармақшы ауданының көне заманнан қазіргі күнге дейінгі негізгі тарихы баяндалған. Содан соң облыс әкімі қайта жөндеуден өткен оқушылар үйінің салтанатты ашылуына қатысты. «Білімді шәкірт - ел болашағының мықты тірегі» десек, өнерге талаптанған өрендерге сапалы білім беруде оқушылар үйінің ықпалы зор. Себебі, халқымыздың барлық асыл қасиеті бала кезден қалыптасады. Отаншыл баланың ойы озық тұрады. Біз ұрпақтың кемел келешегі үшін барлық мүмкіндікті қарастыруға міндеттіміз. Өйткені олар – еркін елдің ертеңі, - деді облыс әкімі.