Ыстанбұлдағы шабуылды Күрдістан содырлары жасаған

Ыстанбұлдағы террорлық шабуылды «Күрдістан еркіндік қырандары» тобы өз мойнына алды, деп хабарлады ТАСС ақпарат агенттігі. Бұған дейін Түркияның премьер-министрі Бинали Йылдырым қанды шабуылды «Күрдістан жұмысшылар тобы» ұйымдастырған болуы мүмкін деген мәлімдеме жасаған. Айта кетейік, 10 желтоқсан күні «Бешикташ» пен «Бурсаспор» командаларының арасындағы матчтан кейін Vodafone Arena стадионының маңында жойқын жарылыс болды. Жарылғыш заттар орнатылған автомобиль тәртіп сақшылары мінген көлік өтіп бара жатқан кезде іске қосылған. Салдарынан соңғы мәліметтер бойынша зардап шеккендердің саны 155 адамға жетті. Ал опат болған 38 адамның 30-ы полиция қызметкері. Бұдан бөлек, 2 лаңкес оқиға орнында қаза тапса, тәртіп сақшылары терактіні ұйымдастырған 13 экстремисті қолға түсірді.