Қазақстан мен Өзбекстан су қатынастары мәселесін талқылады

Өткен аптада, 8-9 желтоқсан күндері Ташкентте Қазақстан мен Өзбекстанның жұмыс топтары су қатынастарының барлық бағыттары бойынша әріптестікті тереңдете түсудің жолдарын қарастыруға арналған жиын өткізді. Бұл туралы CA-News (Uz) ақпарына сүйенген egemen.kz хабарлады. Өзбекстан Сыртқы істер министрлігі баспасөз қызметі таратқан мәліметке қарағанда, достық рәуіште және байырқалы жағдайда қанат жайған кездесуде екі елдің мұның алдында жоғары деңгейдегі өткен қазақ-өзбек келіссөздері барысында қол жеткен келісімдердің жүзеге асырылу жайы жан-жақты талқыланған. Кездесуге Қазақстан делегациясын Ауыл шаруашылығы вице-министрі Ерлан Нысанбаев бастап барса, Өзбекстан жағын Ауыл және су шаруашылығы министрінің орынбасары Шавкат Хамраев басқарған. Басқосудың қорытындысы бойынша тиісті хаттамаға қол қойылды. Жұмыс тобының келесі кездесуі Қазақстан территориясында өтеді.