арынды Ақсудан асып, айдынды Алакөлге жетті
Ақсу жұрты асыға күткен «Тәуелсіз Қазақстан» пойызы Матай темір жол бекетіне 9 желтоқсан күні жеткен еді. Аядай ауылдағы тіршіліктің бір көзі, нәрі болып саналатын шойын жолға елдің үміт артатын жөні бар. Себебі, Елбасының ұйғарымымен ұйымдастырылып отырған республикалық акция балалар үшін мерекеге айналып, ал қарт адамдар сырқатын емдетіп, көңілдерін сергітіп, ел болашағына деген сенімдерін бекіте түсті.
1 мыңға жуық жұрт жиналған перронда салтанатты жиын ұйымдастырылды. Бекет басындағы «Тәуелсіз Қазақстан» пойызы республикалық акциясының делегаттарын қарсы алушылар атынан Ақсу ауданы әкімінің орынбасары Сәбит Қорғанбаев құттықтап, әлеуметтік-экономикалық жетістіктерді тілге тиек ете ұлтаралық татулық, қоғамдағы түсіністік басты құндылықтарымыздың бірі болып табылатынын баса айтты. Матай ауылының тұрғыны, зейнеткер, Ақсу ауданының құрметті азаматы Аймұхан Бейсенбеков бұл акцияның қоғамның қозғаушы күшінің бірі болып табылатын түрлі этнос өкілдерін ізгі мақсаттар жолында біріктіруші фактор ретіндегі маңызына тоқталса, республикалық акция жетекшісі Әміржан Әлпейісов:
– Өтініш тілектер ескерусіз қалмайды. «Тәуелсіз Қазақстан» пойызы республикалық акциясы аясында тұрғындардың өтініш-тілектері мұқият тыңдалып, мәселелерді шешу жолдары жан-жақты қарастырылады, – деді.
Матай темір жол бекетіндегі бір ерекшелік – Түркістан – Сібір темір жолының ашылуына 80 жыл толуына байланысты осында орнатылған ескерткішке гүл шоқтары қойылды. Өз кезегінде Алматы облыстық Қазақстан халқы Ассамблеясының хатшылық меңгерушісі Ғабит Тұрсынбай, облыстық Қоғамдық келісім кеңесінің төрағасы Оралбек Жақиянов бастаған топ арнайы ұйымдастырылған кітап көрмесін тамашалап, тұрғындарды әлеуметтік мәселелер бойынша қабылдады. Матай ауылдық емханасында 335 адам, олардың арасында 38 бала бар, дәрігерлік кеңес алды.
«Тәуелсіз Қазақстан» пойызы» республикалық акциясының құрамындағы мамандардың бір тобы Матай орта мектебінің жұмысымен танысты. Қоғамдық келісім кеңесінің қабылдауымен қатар, мамандар құқықтық көмек көрсету және әлеуметтік мәселелерлер – еңбек және көші-қон саласы бойынша консультативтік кеңестер берді. Зейнетақы жүйесіндегі өзгерістер туралы, мүгедектерге, көп балалы, жалғыз басты аналарға төленетін жәрдемақы, зейнетақы, кәсіпкерлік және ауыл шаруашылығы мәселелері бойынша да көкейлеріндегі сауалдарына халық тұшымды жауап алып, бірқатар мәселелерін шешті.
* * *
«Тәуелсіз Қазақстан» пойызы
10 желтоқсанда Алакөлге де ентікпей жетті. Бір атап өтер жайт – осынау республикалық акция құрамындағы кәсіби мамандар жаңа бекетке жеткенде серпіліп, тың күшпен халыққа етене араласып кететіндігі болды.
Сонымен, Достық бекетінде де ел көңілінен шыққан кездесулер ұйымдастырылып, қалың көпшілік дәрігерлерге қаралды. Келесі бір топқа түрлі бағыттарда кеңестер берілді. Қарапайым халыққа керегі де қандай да бір мәселесінің түйінін шешіп, сырқатына шипа тауып, жақсы сөз естіп, дұрыс ақыл-кеңес алу ғой. Бұл ретте, республикалық акция құрамындағы мамандар кәсіби шеберліктерін көрсете білді.
– Бүгінгі «Тәуелсіз Қазақстан» пойызы республикалық акциясы құрамындағы мамандар ауданымызда денсаулық сақтау саласы, үш тұғырлы тіл, бала асырап алу, 12 жылдық білім, Ұлттық бірыңғай тестілеудегі өзгерістер, ауыл шаруашылығы, өз кәсібін ашу, кәсіпкерлікке несие алу жолдарымен қатар, әлеуметтік мәселелер – зейнетке шығу, көп балалы және толық емес отбасыларына жәрдемақы алу, құқық қорғау мәселелері мен мемлекеттік қызмет көрсету бойынша жалпы 2157 адамды қабылдады. Атқарылған жұмыс нәтижесі күткендегіден де асып түсті, – деді Алакөл ауданы әкімінің орынбасары Алмас Абдинов бастаған ел пойызды шығарып салып тұрып.
Нұрбол Әлдібаев,
«Егемен Қазақстан»
Алматы облысы