Желбіре, көк байрақ!

Облыс жұртшылығы Конституция күні мерекесін жоғары деңгейде атап өтті Еліміздің Ата Заңы қабылданған күнді салтанатпен атап өту республика халқының борышы. Өзін шын қа­зақстандық, елінің ұлтжанды ұл-қы­зы­мын деп есептейтін әрбір азаматқа міндет саналатын аталмыш мерекені Павлодар облысының тұрғындары абыроймен атқарды. Негізгі шаралар облыс орталығында ұйымдасты­рыл­ды. Бұл күні орын алған айтулы оқиғаның бірі – Павлодар қаласының орталық көшелерінің бірінде өткен  мемлекеттік туды көтеру рәсімі. Барша әлемге бейбітшілігі бекем, Қазақстан Республикасы деп аталатын жаңа, тәуелсіз мемлекет бейнесін паш етіп келе жатқан көгілдір түстес туы­мыз енді Павлодар қаласының қақ ортасында желбіреп тұр. Осылайша, Конституция күні мерекесі павло­дар­лықтар үшін әсерлі шарамен бас­талды. Лермонтов көшесі бойындағы саябақта мемлекеттік туды көтеруге арналған салтанатты шара өтті. Әнұ­ра­нымыздың асқақ үнімен биіктігі 40, ал ені 10х20 метр болатын көк байрақ көтерілді. «Туған жерге туыңды тік» дейді дана халқымыз. Олай болса, кіндік қанымыз тамған ұлан-ғайыр жерге алып ту тігу – біз үшін асқан абырой, зор мәртебе. Ту­дың кеңдігі – еліміздің дарқандығы. Біз ұлттық рә­міздерді құрметтей оты­рып, жас ұр­пақтың бойына ұлтжан­ды­лықты сіңі­ре аламыз. Бас байра­ғымыз бейбіт ас­панымызда желбірей берсін. Қазақ­станның мерейі үстем, еліміздің еңсе­сі биік, туымыздың тұғыры берік бол­ғай. Конституция күні құтты бол­сын!», – деді облыс әкімі Бақытжан Сағынтаев. Ел тірегі – елжанды ұрпақ. Ал мемлекеттік рәміздерге деген құр­мет – отаншылдық сезімнің аса бір жар­қын көріністерінің бірі. Сон­дық­тан болар, шараға жастар қауымы көп­теп тартылды. Сондай-ақ, салта­нат­ты рәсімге Ұлы Отан соғысының ардагерлері, тыл еңбеккерлері, мемлекеттік мекеме басшылары мен қала тұрғындары көптеп жиналды. «Көк туымыз желбіреп тұрған бұл саябақ қаламыздағы ең бір көркем, қасиетті орындардың біріне айналатындығына сенімдімін. Бұл әсіресе жастар қа­уымы үшін, оларды ұлтжандылыққа, еңбекқорлыққа тәрбиелеуде аса маңызды. Елордамыз Астананың тө­рінде желбіреп тұрған байрағымызды көргенде «шіркін, біздің де қалада аспанмен таласқан осындай алып ту орнатылса ғой» деп ойлаған едім. Бүгін осы бір арманымызға қол жетіп отыр!», – деп атап өтті қалалық ардагерлер кеңесінің мүшесі Совет Әмірханов. Туды салтанатты жағдайда көтеру құрметі Ұлы Отан соғысының ардагері, Павлодар облысы және Павлодар қаласының Құрметті азаматы Қабдеш Нұркин атамыз бен облыс әкімі Ба­қыт­жан Сағынтаев және облыстық мәс­лихат хатшысы Ринат Гафуровке бұйырды. Бұл ел Тәуелсіздігінің 20 жыл­дығына арналған мерекелік ш­а­ра­­лардың ресми бастауы десе де болады. Бұдан кейін жұртшылық қаланың орталық алаңына жиналды. Салта­натты шара жиырма мыңға жуық адам қатысқан мерекелік шерумен бас­талып, оның соңы халықтық той-думанға ұласты. Сондай-ақ павло­дар­лықтар елордамыз Астана қала­сын­да Елбасы Нұрсұлтан Назарбаевтың қа­тысуымен өткен салтанатты шеруді тікелей эфир арқылы тамашалады. Кеш­ке дейін созылған мерекелеу жергілікті өнерпаздар мен қазақстандық эстрада жұлдыздарының концертімен, отшашумен аяқталды. Данияр ЖҰМАДІЛОВ.