Астанада бас қосты

2-3 қыркүйекте Астанада Қа­зақ Ұлттық музыка академия­сын­да Микаэл Таривердиев атындағы органшылардың VІІ Халық­ара­лық конкурсының азиялық айна­лымы өтеді. Оған елімізден жеті, Корея пен Жапониядан бір-бір үміт­керден қатысса, аталмыш бай­­қауға сыйлы қонақ ретінде белгілі актриса Наталья Арынба­са­рова мен Микаэл Таривердиев мейірімділік қорының президенті, конкурстың арт-директоры Вера Таривердиева шақырылып отыр. Ал қазылар алқасының құра­мын­да Джеймс Дэвид Кристи (АҚШ), Окубо Наоми Мацуи (Жапония), Ғабит Несіпбаев (Қазақстан), Лада Лобзина (Ресей) сынды әлемге танымал органшылар бар. Органшылар конкурсының азия­лық айналымы республикада алғаш рет өткізілгелі отыр. Сон­дай-ақ, бұл байқаудың көрнекті композитор Микаэл Таривер­ди­ев­тің 80 жылдығымен сәйкес келетіндігіне де ерекше мән берілген. Кеше жоғарыда аталған академия ғимаратында конкурс жайында өт­кізілген баспасөз мәслихатында әйгілі органшы Джеймс Дэвид Кристи өзінің бұл байқауға тө­ре­лік ететіндігін Қазақ елінің өзіне де­ген құрметі дей келе, кон­курсқа қатысқалы отырған таланттардан мол үміт күтетіндігін жеткізді. Конкурс аяқталғаннан кейін Қа­зақ Ұлттық музыка академия­сы­ның орган залында «Аз и Я» концерті өтеді. Концерттің негізгі мақсаты – еуразиялық кеңістік идея­сының маңыздылығын жеткізу болса, бағдарламада Шығыс тақырыптарына бет бұрған Шы­ғыс, Ресей, Еуропа композитор­ла­рының туындылары орын­дал­мақ. Аталған шарада сөз бен му­зыка алмасып отырса, Олжас Сү­лей­меновтің «Аз и Я» кітабы мен Шыңғыс Айтматовтың «Ға­сыр­­дан да ұзақ күн», «Теңіз жа­ғалай жүгірген тарғыл төбет, «Қош бол, Гүлсары!», «Ақ кеме», «Кассандра таңбасы» кітап­тарынан үзін­ділер мен өлеңдерді Ресей мен Қазақстанның еңбек сіңірген әр­ті­сі Наталья Арын­ба­сарова оқиды. Сонымен қатар, Микаэл Таривердиев атындағы Халықаралық ор­ганшылар кон­курсы аясында Хироко Иноуэ (Жа­пония), Лада Лабзина (Ресей), Венера Сейітбатталова (Қа­зақстан) сынды лауреаттар тың­дар­мандарын өз өнер­ле­рімен там­сантады деп күтілуде. Әбдірахман ҚЫДЫРБЕК. –––––––––––– Суретті түсірген Орынбай БАЛМҰРАТ.