«Ыбырайдың өсиеті» сахналанды

Қостанай мемлекеттік педагогикалық инсти­тутындағы студенттер театры ақын, драматург Ақылбек Шаяхметтің ұлы ағартушы Ыбырай Алтынсарин туралы «Ыбырайдың өсиеті» атты пьесасын сахналады. Студенттердің қай-қайсысы да өзіне жүктелген рөлді сезімталдықпен ойнап шықты. Ыбырайға қазақ даласында мектеп ашу ғана емес, сауатсыз еліне білімнің маңызын түсіндіру, екінші жағынан миссионерлердің арам пиғылымен арпалыса жүріп, оны өз халқының мүддесіне пайдалану да оңай тиген жоқ. –  Сахнада Алтынсарин тұлғасын сомдау маған жеңіл болған жоқ. Себебі Ыбырай Алтынсаринді ең бірінші ойнауға ниеттенгенде ислам дінін нақты ұстанған адам өзінің дініне берік екендігін білетінмін. Құраннан күш-қуат алатындығын сездім. Мен де осы рөлді сомдау барысында өзімді сол бетке бұрып, Құран қадірін жіті түсінуге тырыстым. Аса терең қайраткердің кейпін сомдау үшін оның рухани деңгейін түсіну керектігін ұқтым, – дейді Ыбырай бабамыздың рөлін сомдаған жаратылыстану-математика факультетінің кә­сіптік оқыту мамандығының 3-курс студенті Думан Сайын. Ақылбек Шаяхмет ұстаздың серігі ақын Нұржан Наушабайұлының Ыбырайға деген кіршіксіз адал достығын бейнелеген. Оның Ыбырайға мектеп ашу барысында қаржылық жағынан да демеушілер табуға мол септігі тигендігін аңғаруға болады. Осы баға жетпес сыйластықты сахнада көрерменге жеткізе білген жас әртістердің жетекшісі Ақбидаш Әбдіркенованың еңбегі зор. Нәзира ЖӘРІМБЕТОВА, «Егемен Қазақстан» ҚОСТАНАЙ