Ақтық сапарға шығарып салды

Қазақстандағы ауыл шаруа­шылығы саласындағы алғашқы өнім өндірушілердің бірі, Қазақ­станның Еңбек Ері, облыстың құрметті азаматы, «Зенченко и К» командиттік серіктестігінің бас директоры Геннадий Зенченконы қалың жұртшылық ақтық сапарға шығарып салды. Марқұммен қоштасуға жақындары, әріптестері, қоғам қайраткерлері келді. Қоштасу рәсімінде облыс әкімі Ерік Сұлтанов Елбасы Нұрсұлтан Назарбаевтың көңіл айту жеделхатын оқып берді. Онда «Геннадий Иванович өмірінің басым бөлігін ауыл шаруашылығы саласына арнады. Елдің әлеуметтік-эконо­микалық дамуына елеулі үлес қосты. Оны ылғи да өзінің адам­гершілік қасиеттері, жоғары кәсіби біліктілігі, бай тәжірибесі мен өз ісін сүйе білу қасиеттері өзгелерден ерекшелендіріп тұратын. Оның еңбектері «Қазақстанның Еңбек Ері», өзге де мемлекеттік наградалар арқылы бағаланды. Геннадий оны танитын адамдардың есінде әрдайым сақталады», делінген. Көңіл айту жеделхаттары Премьер-Министр Бақытжан Са­ғын­таев, Парламент Мәжілісінің Төр­ағасы Нұрлан Нығматулин, «Астана ЭКСПО-2017» Ұлттық ком­­паниясы» АҚ-тың төрағасы Ах­метжан Есімов, Ақтөбе облы­сының әкімі Бердібек Сапар­баев, Қостанай облысының әкімі Архимед Мұхамбетовтен келді. Қаралы митингіде Ауыл ша­руа­­шылығы вице-министрі Серік Егізбаев, еңбек ардагері Жа­қ­сылық Ысқақов, Парламент Мә­жілісінің депутаты Абай Тасбо­латов, Қазақстанның Еңбек Ері, «Қарқын» ЖШС-нің директоры Сайран Бұқанов, Қазақстанның Еңбек Ері, «Родина» агрофирмасы» ЖШС-нің бас директоры Иван Сауэр сөйлеп, қайғыға ортақтасты. Геннадий Иванович саналы ғұмырының жарты ғасырын ауыл шаруашылығы саласына арнады. Оның 20 жылдан астам уақытында «Зен­ченко және К» агроқұрылымын бас­қарды. Көп жылғы қажырлы еңбегі екі рет «Отан» орденімен, «Ал­тын барыс» төсбелгісімен атап өтілді. Марқұмның денесі өзі еңбек еткен Новоникольское елді меке­ніндегі зиратқа жерленді. Өмір ЕСҚАЛИ, «Егемен Қазақстан» Солтүстік Қазақстан облысы, Қызылжар ауданы