Жас ұрпақты жаңа ұйымға қабылдады

Кеше Елбасы Нұрсұлтан Назарбаев елордада биыл ашылған №66 мектеп-лицейде болып, «Жас қыран» және «Жас ұлан» бірыңғай балалар мен жасөспірімдер ұйымының алғашқы мүшелерін қабылдауға арналған салтанатты шараға қатысты. Жаратылыстану ғылымдарын тереңдетіп оқытатын мектеп-лицей халықтың көз қуанышына айналды. Бұл білім ұясы Есіл ауда­нына қарасты «Бәйтерек» мо­нументі маңына орналасқан. «Алтын ХХІ» ЖШС салған мектеп биылғы жылдың 5 қаң­та­рын­да Астана қаласы әкімдігінің қау­лысымен ашылғанын да айта кетейін. Жобалық қуаты бойынша 1200 баланы қабылдай алатын лицей алдағы уақытта өз оқушыларын физика, математика, химия және биология пән­де­ріне тереңдетіп оқытпақ. Елбасы Н.Назарбаевтың қатысуымен өт­кен салтанатты шара үздік оқу­шы­ларды «Жас ұлан» бірыңғай балалар мен жасөспірімдер ұйы­мына алғашқы мүшелер қа­был­дауымен маңызды болды. Мемлекет басшысы Н.Назарбаев «Нұр Отан» ХДП-ның ХІІІ съезінде Қазақстандағы балалар мен жасөспірімдерге арналған жаңа жүйе құру керектігін айт­қан. Осыған орай, еліміздегі жастар ұйымдары көшбасшы­лары­ның бастамасы «Жас ұлан» бір­ың­ғай балалар мен жасөс­пі­рім­дер ұйымы құрылған еді. Бұл  жаңа тұрпатты жас қазақ­стан­дық­ты, ұлттың болашақ эли­та­сын қалыптастыруға бағытталған балалар мен жасөспірімдер ұйы­мы болып табылады. Бұл күні қала оқушылары бой­ынша іріктелген 150 үздік оқушы «Жас қыран» және «Жас ұлан» ұйымының мүшесі ата­нып, Президент Н.Назар­баев­тың қо­лы­нан ұйымның туын қабылдап алды. Білім күнімен барша ұс­таз­дар мен оқушы­лар­ды құттықтаған Елбасы Н.На­зарбаев, биыл Қа­зақ­станда оқу­шыларға 7441 мектеп­тің есігі ашылады, 2,5 миллион бала мектепке барады. 20 жыл ішінде еліміз бойынша 780 мектеп салынды. 2020 жылға дейін та­ғы да 513 мектеп іске қосы­ла­ды. Бүлдіршіндеріміздің 56 пай­ы­­зы балабақшаға баратын болды. Жаратылыстану білімі Қа­зақ­стан­ға өте қажет. Ашы­ла­тын жа­ңалықтар да, ғылымның шыңы да дәл осы мамандық­тар­дан шы­ғуда. Қандай мамандықты таң­да­саңыздар сол мамандықтың шы­ңы­на жететін болыңыздар, деді. Салтанатты шара аяқталған соң, Елбасы мектеп ғимаратын аралады. Президент мектептің кіреберісінде орнатылған элек­трон­ды өткізу жүйесімен таны­сып, сынып бөлмесіндегі үлкен экраннан оқу фильмін тама­ша­ла­ды. Информатика пәнінің мұға­лі­мі мен оқушылар Президентке оқу үдерісінде жаңа иннова­ция­лық технологиялардың қолданы­луы жөнінде әңгімелеп берді. Сондай-ақ, Мемлекет басшысы ел Тәуелсіздігінің 20 жылдығына арналған 4-сыныптың сабағына қатысты. Бұл мектепте 1 мен 10- сыныптар аралығында 1600 оқушы оқып, оларға 80 ұстаз сабақ береді. Жоғары және бірінші санаттағы мұғалімдер барлық оқытушы құрамның 55 пайызын құрайды. Оқушылар мен мұға­лімдердің негізгі бөлігі №59 мектеп-лицейінен ауысып келген. Жергілікті бюджеттен элек­трон­ды қауіпсіздік жүйесіне  элек­тронды журнал, оқушының электронды күнделігі, мектепті әкімшілендіру және басқару бой­ынша электронды мәліметтер ба­засына қаражат бөлінген. Мек­тептің материалдық жабдықта­луы­на келер болсақ, оқушы­лар­дың қауіпсіздік жүйесі, 4 информатика кабинеті, үлкен және ша­ғын 2 спорт залы, футбол, волейбол-баскетбол алаңдары, оқу за­лы­мен қоса кітапхана, 560 орын­дық акт залы, сондай-ақ би залы бар. Мектеп-лицейдің өзге мектептерден басты айырма­шы­лығы ондағы электронды қауіп­сіздік жүйесінің орнаты­луында. Бұл жөнінде лицей директоры Айжан Шаяхметова аталған жүйе арқылы оқушы мектепке кірер кезде арнайы таңбаға саусағын тигізгенде арнайы құрал ашы­лып, оқушы ішке кіреді. Сабақ аяқталған кезде де осы үрдіс арқылы мектептен шығады, деді. Жұлдыз БАЙДІЛДА. ----------------------------------------- Суреттерді түсіргендер С.БОНДАРЕНКО, Б.ОТАРБАЕВ.