Шығармашылық ұжым миллионер атанды

Солтүстік өңірде 2,5 мыңға жуық қызметкердің басын біріктіретін 595 мәдениет мекемелері облыс жұртшылығына қалтқысыз қызмет көрсетіп келеді. Соңғы жылдары олардың материалдық-техникалық базасы, кадрлардың сапалық әлеу­еті нығайып, «Жұмыспен қам­­тудың жол картасы-2020» бағ­­дар­ламасы шеңберінде 101 мә­­дениет және мұрағат ғи­ма­ра­ты қалпына келтірілді. Тәу­ел­­сіздіктің ширек ғасырлық ке­зеңінде екі театр, алты мұражай, «Абылайхан» резиденциясы» мұражай кешені, жастар сарайы бой көтерді. Қаржыландыру он есеге көбейіп, концерттік және гастрольдік сапарлар жиі ұйым­дас­тырылатын болды. Елді мекендерде жабылып қалған клубтар, кітапханалар, мәдениет үйлері қайтадан іске қосылды. Жа­­ғымды жаңалықтардың бі­рі­не С.Мұқанов атындағы қа­зақ саз­ды-драма театрындағы кө­рер­мен­дер залының 500 орынға дейін ұл­ғайтылып, жобалау-сметалық құжаттардың түзілуін атауға болады. Н.Погодин атындағы орыс дра­ма театрында өткен салтанат­ты кеште мәдениет саласы өкіл­деріне ерекше құрмет көр­се­тілді. Көрмеге тарихи құн­ды жәдігерлер, С.Мұқанов, Ғ.Мүсірепов, И.Шухов секілді та­­нымал жерлес жазушылардың же­­ке заттары қойылды. Облыс әкімі Ерік Сұлтанов жас ұрпақты рухани тәрбиелеуге үлкен үлес қосып, өміріне өнерді серік етіп келе жатқан бір топ мәдениет саласы өкілдерін марапаттады. Барлық аудандарда жекеле­ген аталымдар бойынша өткізіл­ген бай­қаулардың қорытындылары осы жиында шығарылып, же­ңімпаздар анықталды. Мұра­жай­лар арасында Шоқан Уәлиханов атын­дағы Сырымбет тарихи-этно­графиялық мұражайы мен Есіл аудандық мұражайы озып шығып, әрқайсысына 500 мың теңгенің сертификаты берілді. «Үздік медиатека» ата­лымы бойынша Тимирязев ау­дандық кітапханасына 300 мың тең­генің сыйақысы тапсырылды. Қызылжар ауданының мұрағат ұжы­мы 500 мың теңгені олжала­ды. «Үздік ауылдық мәдениет – 2016» аталымында Айыртау ау­да­ны Гран-при иегері атанып, 2 мил­лион, ал Шал ақын ауданы 1,5 мил­лион теңгеге ие болды. Н.Погодин атындағы орыс драма театрына 10 миллион теңгенің сертификаты сый­лан­ды. Өмір ЕСҚАЛИ, «Егемен Қазақстан» Солтүстік Қазақстан облысы