Францияда күн батареяларынан автожол салынды

22 желтоқсан күні Францияның батысында күн батареялары бар панельдермен жабдықталған әлемдегі алғашқы автожол ашылды. Салтанатты шараға осы елдің Экология, тұрақты даму және энергетика министрі Сеголен Руаяль қатысты, деп хабарлайды ТАСС. Министр шара барысында бұл жоба басқа да мемлекеттерді қызықтыратынына үміттенетінін айтты. "Марракештегі БҰҰ-ның климат туралы конференциясында бір жыл бұрын осы жоба таныстырылған болатын. Мына жолдың бетіне күн сәулесін электр энергиясына айналдыратын панно орналастырылған. Ол ауыл шаруашылығына қажетті жерлерді үнемдеуге мүмкіндік береді", - деді министр. Аталған жол Турувр қаласында орналасқан. Қазір пайдалануға жолдың алғашқы километрі берілді. Ол жерде 28 шаршы метр күн батареялары бар. Мемлекет қаржылық қолдау көрсеткен жобаға жалпы 5 млн еуро кеткен. Ал күн батареялары 5 мың тұрғыны бар қаланы электр энергиясымен қамтуға мүмкіндік береді деп күтілуде. Министрдің айтуынша, Францияда 2017 жылы жаңа даму бағдарламасы қабыданады. Бағдарлама аясында 5 жылдың ішінде мың километр жолды күн панелдерімен жабдықтау жоспарлануда. Бір айта кетерлігі, ең алғаш күн батареялары тәжірибе ретінде Нидерландыда велосипед жолына қолданылған. Басында күн батареяларының қыс кезінде тез тозып кететіні байқалған. Кейін мамандар бұл кемшілікті жойды. Енді Германия Кельн қаласының маңында күн батареялары бар жол салуды жоспарлап отыр.