БҚО театрларына 100 млн теңге бөлінбек

Алдағы жылы Батыс Қазақстан облысы театрларын жарақтандыру, сахналарын безендіру және жаңа киім-кешек алуға 100 млн теңге жұмсалмақ. Бұл туралы облыс әкімі Алтай Көлгінов мәдениет саласының қызметкерлерімен кездесуінде айтты. Өңір басшысының атап өткеніндей, тәуелсіздік жылдары мәдениет және өнер саласында да көптеген өзгеріс-жаңалықтар болды. Мысалы, қазіргі таңда 600 млн. жуық теңгеге 28 мәдениет нысаны күрделі және ағымдағы жөндеуден өткізілуде. Бұдан кейінгі кезек театрларға келмекші. Оралда Батыс Қазақстан облыстық қазақ драма театры мен А.Островский атындағы орыс драма театры болса, аудандарда халық театрлары бар. Міне, солардың да заман талабына сай жаңғыртылуы үшін қажетті көмек-қолдау көрсетілетін болады. Жиын барысында Алтай Көлгінов Тәуелсіздіктің 25 жылдығына орай Елбасы Жарлығымен марапатталған елге танымал дәстүрлі әнші, Ғ.Құрманғалиев атындағы облыстық филармония солисі Дастан Есентеміровке «Ерен еңбегі үшін» медалін табыс етті. Сондай-ақ Сырым және Шыңғырлау аудандық орталықтандырылған кітапхана жүйесінің директорлары Раушан Хасанова мен Гүлсім Қуанаева, Теректі ауданы Федоров ауылдық орталықтандырылған кітапхана жүйесінің директоры Марина Лукманова, Құрманғазы атындағы музыка колледжі халық аспаптар бөлімінің меңгерушісі Асылғаным Құсмағамбетоваға «Мәдениет саласының үздігі» төсбелгісі табыс етілді. Тағы бірқатары облыс әкімі мен ҚР Мәдениет және спорт министрінің алғысхаттарына, басқа да марапаттарға ие болды.