Экспорттық әлеует арта түсті

Бүгінгі таңда Қазақстан әлемдегі ірі экспорттаушы саналатын 50 елдің қатарына кіреді. Еліміз Түрікменстанға, Тәжікстанға, Әзербайжанға, Қырғызстанға электровоздарды, тепловоздарды экспорттайды. Қазақстандық кілемдер Гер­ма­нияда, Англияда, Украинада, сон­дай-ақ, IKEARUSSIA желісінің 52 супермаркетінде ұсынылған, теле­коммуникация жабдықтары Иран­ға, Түрікменстанға экспортталады, MADEINKAZAKHSTAN тауық жұмыртқалары Ауғанстанға, Бірік­кен Араб Әмірліктеріне шыға­рылады. Отандық картридж өнді­ру­шісі өз өнімін Беларуське, Түрік­мен­станға жеткізеді, ерлерге арналған қазақстандық костюмдер Мәскеудің сауда орталығында саудаланады. Бұдан бөлек, нарықта Қазақстан уран экспорты бойынша – 1, ұн экспорты бойынша – 2 және титан бойынша 3 орында. Мұның барлығы – Қазақстанның 25 жыл ішіндегі экс­порттық әлеуетті көтеруге бағытталған ерен еңбегінің жемісі. 2016 жылдың қорытындылары бойынша еліміздің тауар айналымы 58 млрд АҚШ долларын құрап отыр. Оның 35 млрд доллары экспорттың және 23 млрд доллары импорттың үлесінде. Бұл біздің сырттан сатып алғаннан гөрі, көбірек сатып жатқанымызды аңғартады. Еліміздің экспорттық әлеуеті, және оны дамыту мен жылжыту мәселелері бойынша «KAZNEX INVEST» акционерлік қоғамының 2016 жылы ат­қарған жұмыс қорытындылары жө­нінде Орталық коммуникациялар қызметінде өткен баспасөз мәсли­хатында басқарма төрағасының орын­басары Мейіржан Майкенов әңгі­меледі. Оның айтуынша, экспорт кө­ле­міндегі өңделген тауар үлесі 24-тен 35 пайызға ұлғайған. Бұл еліміздің сыртқы нарықтың сұранысына икем­деліп, тауарды шикізат түрінде емес, өңдеп экспорттауға бейімделіп келе жатқанын байқатады. «Экспорттық тауарлардың номенклатурасы 969 позицияға дейін ұлғайды, мысалы, 2008 жылы біз 880-ге жуық тауар позицияла­рын экспорттадық. Еліміздің экспорт географиясы да кеңейіп келеді, қа­зір­гі таңда Қазақстан әлемнің 117 еліне тауар экспорттайды. Елеулі дәрежеде бұған индустрияландыру бағдарламасының шеңберінде жаңа өндірістерді іске қосуға, сон­дай-ақ, мемлекет тарапынан отан­дық өндірушілерді экспорттық қол­дау құралдарымен, кеңінен қам­туға ықпал етілді. 2016 жылдың қоры­тындысы бойынша дайын тауар­лардың экспорты 14%-ға артады деп болжап отырмыз», – деп атап өтті Мейіржан Майкенов. Сондай-ақ, ол шетел нарығына өнім шығаруды көздейтін отандық кә­сіпкерлерге үлкен қолдау көрсетіліп жатқанын жеткізді. «Жалпы, Қазақстанның экспортқа бағдарланған компанияларына қолдау көрсету үшін биыл 66 іс-шара өткізілді, атап айтсақ, отандық 40 кәсіпорынның шетелдік көрмелерге қатысуы ұйымдастырылды, 17 сау­да миссиясы өткізілді, шетелдің ірі көрмелерінде Қазақстанның 4 ұлттық стенді таныстырылды. Жыл қорытындысы бойынша «KAZNEX INVEST» қолдауымен өндірушілер 200 млн АҚШ долларына дәрі-дәрмек, медициналық бұйымдар, тұз, құрылыс материалдары, ерлердің костюмі, балалар киімі, макарон, ұн, шырын, сусын, кондитерлік бұйымдар жеткізуге экспорттық келісімшарттар жасады. Экспорттаушыларды қолдау бағдарламасының тиімділігі туралы айтқанда, отандық компанияларды экспортқа жылжытуға жұмсалған 1 бюджеттік теңгенің экспорттық келісімшарттар түрінде 59 теңге әкелгенін атап өткен жөн», – деп қорытындылады «KAZNEX INVEST» басқарма төрағасының орынбасары. Жалпы, «KAZNEX INVEST» экспорт және инвестициялар ұлттық агенттігі қызмет ету жылдары барысында өз өнімдерін сыртқы нарыққа шығару үшін Қазақстанның 1500-ден астам өндірушілеріне ықпал етті, 500-ден астам іс-шаралар ұйымдастырылды, олар бойынша жалпы сомасы 2 млрд АҚШ долларына келісімшарттар жасалды. Айдар ӨРІСБАЕВ, «Егемен Қазақстан»