Универсиада алауы
Қазақстанның 14 өңірінде жағылған 2017 жылғы 28-ші Дүниежүзілік Қысқы Универсиаданың алауы 25-29 қаңтарда Алматыға жеткізіледі, онда әкелінген барлық алаулар ойындардың салтанатты ашылу рәсімі кезінде Универсиаданың үлкен бір Алауына біріктіріледі. Алаулар қауіпсіз шахтерлік Дэви лампаларымен тасымалданады, оларды техникалық мамандар мен өңірлік ЖОО-ның үздік студенттері алып жүреді. Жарыстар Қазақстанның оңтүстік астанасында 2017 жылғы 29 қаңтардан 8 ақпанға дейін өтеді. Қысқы Универсиаданың бағдарламасына спорттың 12 түрі кірді. Жарыстарға 2 мыңға жуық спортшы қатысады деп күтілуде.
Еліміздегі ең ірі «Эйр Астана» әуе компаниясы ұлттық тасымалдаушы ретінде 2017 жылғы Алматыдағы 28-ші Бүкіләлемдік қысқы Универсиаданың ұйымдастыру комитетімен ынтымақтастық жөнінде келісімшарт жасасты. «Эйр Астана» АҚ президенті Питер Фостер және 2017 жылғы Универсиада дирекциясының басшысы Наиль Нуров құжатқа қол қойып, соның негізінде аталған қазақстандық әуе компаниясы Қысқы ойындардың демеушісі атанып, Универсиаданың ресми серіктесі деп танылды.
Келісімшарт негізінде, «Эйр Астана» жергілікті және халықаралық әуе рейстеріне спортшылар мен дирекцияның ресми өкілдеріне айтарлықтай жеңілдіктер жасайды. Эстафета алауын Астанадан өзге 15 өңір мен Алматы қаласына тасымалдаумен айналысатын болады. Және де ақысыз түрде дирекция шараларын өз коммуникациялық тетіктері арқылы насихаттайды.
– Қысқы Универсиаданы ұйымдастыруға көмектесуге мүмкіндік алғанымыз бізді қанаттандырып, жігерімізге күш қосты, – деп атап өтті «Эйр Астана» әуе компаниясының президенті Питер Фостер. – Спорт сайыстарының ең маңыздысы Алматыда өтіп жатқаны әлемге Қазақстанның зор мүмкіндігі мен әлеуетін көрсетіп, елдің танымалдығы мен туристік мүмкіндіктерін одан әрі арттыруға ықпал етеді. «Эйр Астана» аталған шараға қолдау көрсетуді үлкен мәртебе деп санайды.
– Бүгінгі таңда «Эйр Астана» әуе компаниясы әлемдегі ең үздік компаниялардың бірі болып табылады. Біздерге, Ойындарды ұйымдастыру комитеті үшін «Эйр Астанамен» ынтымақтастық орнату, Универсиаданы сәтті өткізу берік сенім қалыптастыратыны талассыз, – деді 2017 жылғы қысқы Универсиада дирекциясының басшысы Наиль Нуров.
Атап айтарлығы, 28-ші Бүкіләлемдік қысқы Универсиада 2017 жылдың 29 қаңтары мен 8 ақпаны аралығында Алматыда өтеді. Қысқы Универсиада бағдарламасына мәнерлеп сырғанау, шорт-трек, тау шаңғысы, сноуборд, биатлон, шаңғымен жарысу, шайбалы хоккей (әйелдер мен ерлер арасындағы), керлинг, шаңғымен трамплиннен секіру, шаңғы қоссайысы, конькимен жүгіру, фристайл секілді 12 спорт түрі кірген. Жарыстарға 2 мыңға жуық спортшы қатысады деп күтілуде. Универсиада өткізілетін уақытта 3 мың ерікті, оның ішінде шетелдік еріктілер атсалысады. Студенттер арасындағы спорт ойындарына бірнеше мың отандық және шетелдік турист келеді деп болжануда. Сайыстарды әлемнің 80 еліндегі 1 миллиард адам теледидар арқылы тамашалап, қайталанбас керемет ойындардың куәсі болмақ.
«Эйр Астана» 2002 жылдың 15 мамырынан бері ұшырылымды жүзеге асырып келеді, бүгінде Батыста шығарылған 30 ұшақтан тұратын Boeing 767-300ER, Boeing 757-200, Airbus A320 и Embraer E190 әуе кемелеріне арналған паркі бар. Компанияның маршруттық желісі 60-тан астам халықаралық, өңірлік бағытты қамтиды. «Эйр Астана» ТМД және Шығыс Еуропа әуе компаниялары арасында Skytrax World Airline Awards 2012 беделді жүлденің 4 жұлдызына бірінші болып, лайықты атанды. Және де Орталық Азия мен Үндістандағы ең үздік әуе компаниясы болып танылды. Қос жүлде, 2013, 2014, 2015 және 2016 жылдары расталды. Осындай жоғары көрсеткіштер мен биік деңгейге жетіп жүрген компанияның жүктелген жауапты міндетті абыроймен атқарып шығатындығына сенім мол.
Айнаш ЕСАЛИ,
«Егемен Қазақстан»
