Ангиограф инсульттың алдын алады

Атырау­дағы облыстық ауру­хананың рентген-хирургі Мұрат Қайралиев бір айда 20-ға жуық ота жасады. Қолы жеңіл дәрігерге алғысын жаудырған 57 жастағы науқас «Мидағы қан айналым жүйесінің бұзылуы» деген диагнозымен ауруханаға жатқан. Рентген-хирург науқастың ағза­сына артериялық қан тамыры арқылы кішкентай катетер енгі­зіп, монитор арқылы ішкі ағзаны бақылағанын айтады. Осындай тәсілмен жатыр мойны ісіктерін де емдеуге болады екен. – Бір айда мұнша ота жа­сал­ған емес. Бұған ангиограф деп аталатын жаңа медициналық құрылғы арқылы қол жетті. Бұрын біздің облыста мұндай құ­рылғы болмаған еді. Осы құрылғының көмегімен инсульт ауруының алдын алуға, жедел анықтау диагнозын қоюға жол ашылып отыр. Құрылғы 340 миллион теңгеге сатып алынды, – дейді облыстық денсаулық сақтау басқармасының басшысы Аманбек Жұмыров. Жолдасбек ШӨПЕҒҰЛ,  «Егемен Қазақстан» АТЫРАУ