Халықаралық «Алаш» сыйлығының лауреаты Еркінбек Тұрысовтың жазушы болып қалыптасуына әйгілі Мұхтар Әуезовтің шарапаты мен шапағаты көп тигенін әдебиет сүйер қауым жақсы біледі. Елуінші жылдардың соңында М.Әуезов осы заман тақырыбына роман жазуды көздеп, Оңтүстік Қазақстан облысының Алғабас, Созақ, Түркістан, Мақтаарал аудандарын аралағаны мәлім. Ұлы жазушы халықтың тұрмыс-тіршілігімен, мәдениет жағдайымен танысты, малшылар, мақташылар өмірінен бірнеше очерктер жариялады. Міне, сол сапарларында ұлы жазушының қасында жүрген Е.Тұрысовтың алған тәлімі мол. Тұңғышының есімін Мұхтар қоюы да көп жайтты аңғартады. Кезінде дана Мұхтар еркелетіп, мейірімін төккен бала Мұхтар бүгінде өзі де ел ағасы атанып отыр.
«Мұхтар Әуезов пен әкемнің арасындағы шынайы достықтан, тығыз шығармашылық байланыстан хабары бар адамдар менің есімім Мұхтар қойылу себебін айтпай-ақ түсінетінін өмірде жиі кездестіріп жүрмін. Бірақ сол ұлы Мұхтар Әуезовтің тізесіне отырып, менің сәби кезімде суретке түскенімді, осы сурет кейіннен кітаптың мұқабасында жарияланғанын жақын туыстарымыздан басқалар біле бермейді. Біреулер кітаптың мұқабасындағы суретке қарап отырып, Мұхаңның тізесіндегі сәбиді ұлы Мұрат деп, енді біреулер немерелерінің бірі болар деп жорамал жасайды. Әкемнің айтуынша, Мұхтар Әуезов Оңтүстік Қазақстан облысына бару үшін Алматыдан жолға шыққанын хабарлап, он айлық мені көріп қайтуға арнайы ат басын бұратынын ескерткен екен. Қуанышты хабарды естіген олар ұйқысыз түн өткізіп, жан-жақты дайындық қамына кіріседі.
1961 жылдың 25 сәуірінде қасына атақты жазушы Тәкен Әлімқұловты, облыс, аудан басшыларын ертіп келе жатқан Мұхтар ағаны көргенде әкемнің қуанышы қойнына сыймай, мені үкідей үлпілдетіп алдынан алып шығыпты. Шәй ішілген соң қонақтар бір сәт тысқа, таза ауаға шыққан кезде Мұхаң өзінің құрметіне есімі қойылған сәбиге айналып-толғанып төрдегі орнынан жылжымай қалып қойса керек. Үлкен кісілермен бірге жүрген фототілші Үркімбек Елеубеков осы сәтті тиімді пайдаланып, бірнеше рет түсіріп үлгеріпті. Бертініректе жолым түсіп, Алматыға барғанымда мұражайға айналған ұлы жазушы тұрған үйге кіріп шықтым. Үлкен портрет жасалып, төрге ілініп қойылған Мұхтар атамен бірге түскен тарихи сурет көзіме оттай басылды. Суреттің астыңғы жағына «Ел болам десең, бесігіңді түзе» деген қанатты сөзі жазылыпты», дейді дана Мұхтар Әуезовпен түскен суреттің сырын баяндаған Мұхтар Тұрысов сол бір күндерді еске алып.
Ғалымжан ЕЛШІБАЙ, «Егемен Қазақстан»
