Маңызды сұрақтарға – мағыналы жауаптар

Парламент Мәжілісінің депутаттары Аманжан Жамалов пен Сапархан Омаров Ақтөбе облысындағы денсаулық сақтау саласы қызметкерлерімен кездесіп, Президент Үндеуі мен Жолдауында қойылған міндеттерге байланысты әңгімелер қозғады. Бірінен соң бірі іле-шала Қазақстан халқына арналған биылғы жылдың бұл екі қабырғалы құжаты бірін-бірі толықтыра түсуімен құнды. Оның біріншісі Қазақстан қоғамын саяси тұрғыдан жаңғырту және демократияландыруды одан әрі тереңдетуге арналса, Жолдауда негізінен елімізді экономикалық тұрғыдан жаңғырту ісіне баса көңіл бөлінген. Оның басты жолы жаһандық бәсекеге қабілеттілікті қамтамасыз ету болып табылады. Бұл қалпақпен ұрып ала қоятын оп-оңай іс емес. Сондықтан да Мемлекет басшысы оны экономикалық өсімнің жаңа моделін құру арқылы іске асыру міндетін қойды. Мұның өзі республика өңірлеріне де тың әрі соны серпін беруге тиісті деп тұжырымдады өз ойларын Парламент депутаттары. Осылайша Үндеу мен Жолдаудың маңызы мен атқаратын рөліне терең талдау жасаған биліктің заң шығарушы тармағының өкілдері бұдан кейін кездесуге қатысушылардың сан алуан сұрақтарына жауаптар қайтарды. Айталық, дүниеге жаңа келген сәби­ге ек­пе жасаудан бас тартқан ата-ананы заң жүзінде жауапқа тартуға бола ма деген сауалға Аман­­жан Мәкәрім­ұлы: «Бұл мәселе халық­аралық конвенция нор­ма­ларынан қашық кетпеуі керек. Ал мұн­дай жағ­дай­да заңға сәйкес шаралар қол­дану қажеттігі қарастырылмаған. Сон­дық­тан бұл арада ата-аналармен жүр­гізі­летін түсінік жұмыстарына ба­сым­дық берілуі керек», – деп жауап қайтарды. Сондай-ақ, елімізде жеңіл өнер­кәсіптің дамуы неге кенже қалып отыр деген мәселеге Сапар­хан Кесікбайұлы тарапынан: «Елімізде мұндай кідіріс бар екені рас. Дегенмен, республика Үкіметінде белгіленіп отырған кейінгі шаралар оны бір­шама реттеуді көздейді. Бұл бағыт­та шағын және орта бизнес өкіл­дері үшін біршама жеңілдіктер қарас­тырыл­ған. Ең бастысы, қазіргі күні жеңіл өнеркәсіп саласы бо­йынша шығарылатын тауарларды қайткенде бәсекеге қабілетті етуге болады деген мәселелер ойластырылуда», – деген түйін жасады. Темір ҚҰСАЙЫН, «Егемен Қазақстан» АҚТӨБЕ