Телевизиядағы тұңғыш «Тұмар» жүлдесі табысталды

Ақпарат және коммуникациялар министрлігінің қолдауымен «Қазмедиа» орталығының концерт залында «Тұмар» І Ұлттық телевизиялық жүлдесі тапсырылды. Қы­зылды-жасылды киім киіп қырмызыдай құлпырған теле­ви­зия­дағы қыз-келіншектер мен шал­барларының қыры сынбаған ер азаматтар «Тұмар» жүлде­сінің тапсырылу рәсіміне айрық­ша дайындалып келгендері көрі­ніп тұрды. Олар қызыл кілем­нің үстінен тұп-тура екі сағатта жүріп өткен соң жүлдені тапсыру салтанаты да басталып кетті. «Тұмар» жүлдесі отандық телевизия тарихында тұңғыш рет тағайындалып отыр. Кім алады дегізіп көпшілікті тықыршытқан жүлде 12 аталым бойынша тапсырылып, «Тұмар» ескерткіш мүсіншелері ұсынылды. Ең алдымен сарапшылар 12 ақпаннан бастап осы жүлдені алу үшін жолданған материалдарды қарап, бағалап, ең соңында лайықты шешім шығарғанын атап өтуіміз қажет. Бір айдың көлемінде ұйым­дастыру комитетіне телеарналар мен продакшн-студиялардан 200-ден астам өтінім келіп түскен. Ал Парламент Сенатының де­пу­таты Жабал Ерғалиев, «Қазақ­стан Республикасы Президентінің Теле­радиокешені» АҚ бас ди­рек­­торы Ерлан Бекхожин, Қа­зақ­­стан баспасөз клубының прези­денті Әсел Қарауылова, «Мило­сердие» қайырымдылық қоры­ның ди­ректоры Аружан Саин, теле­визия саласының танымал жур­на­листері Иманғали Нұрті­леу­ұлы, Би­бігүл Жексенбай, Алек­сандр Ак­сютиц, т.б бірқатар маман­дар­дан құралған қазылар алқасы өті­німдердің арасынан 12 аталым бо­йынша жеңімпаздарды анықтады. Сонымен, жабық дауыс беру арқылы еліміздегі бүкіл респуб­ликалық телеарналар арасындағы бәйгеде «Ең үздік әлеуметтік жоба» аталымы бойынша «Қа­зақ­стан» Ұлттық арнасының «Ай­туға оңай» бағдарламасы жүл­дегер атанды. «Ең үздік аймақтық әлеу­меттік бағдарлама» аталымында Ақтөбе қаласындағы «Рика ТВ» арнасының «Город сегодня» бағдарламасы топ жарды. «Ең үздік ақпараттық бағдарлама» аталымында «31 арнаның» қазақ және орыс тілдеріндегі «Информ­бюро» жаңалықтар қызметіне жүлде тапсырылды. Ал «Ең үздік аймақтық ақпа­рат­тық бағдарлама» ретінде «Қа­зақстан-Атырау» телеарнасының «Адасқандар» бағдарламасы «Тұмар» жүлдесімен марапаттал­ды. «Ең үздік әзіл-сықақ бағ­дар­ламасы» аталымындағы жүлдені «Балапан» арнасының «Күлегеш» бағ­дарламасы жеңіп алса, «Қа­­­зақстан» Ұлттық арнасының «Әке» телесериалы «Ең үздік те­ле­­­ви­зиялық телехикая» деп таныл­ды. «Ең үздік музыкалық бағ­дар­лама» аталымында «TV Key» компаниясының «Музыкальный перформанс» бағдарламасы мойны озық шықса, «Ең үздік ток-шоу» ретінде КТК телеарнасының «Наша правда: «Судьба человека» бағдарламасы бәйгеден келді. «Ең үздік ақпараттық-талдамалы» бағдарлама аталымында «Қазақ­стан» Ұлттық арнасының «Apta.kz» бағдарламасы, «Ең үздік де­рек­­ті кино» аталымында «Хабар» агенттігінің «Тайны и судьбы великих казахов» фильмі «Тұмар» жүлдесімен марапатталды. «Телевизиялық маусымның ең үздік оқиғасы» «Atameken busi­ness channel» арнасының ашы­луы болса, «Телевизияның да­муына қос­қан үлесі үшін» аталымы бойын­ша қоғам қайраткері, белгілі көсем­сөзші Сұлтан Ораза­лы марапат­талды. Телевизия саласына арналған салтанатты шараның соңын ала құттықтау сөз сөйлеген Ақпарат және коммуникациялар министрі Дәурен Абаев мерзімді баспасөз бен интернет-журналистика саласында да осы тектес сыйлық тағайындалатынын айтып өтті. «Бүгін Ақпарат және коммуникациялар министрлігінің атына көптеген жақсы сөздер айтылды. Бұл – біз үшін үлкен абырой. Ендігі жүлде баспасөз саласы мен интернет-журналистикаға, онлайн-басылымдарға арналады», – деді ол. Айгүл СЕЙІЛОВА, «Егемен Қазақстан» Суретті түсірген Орынбай БАЛМҰРАТ, «Егемен Қазақстан»