Жуырда Ереван Мемлекеттік университетінде Елбасы Н.Назарбаевтың Қазақстан халқына арнаған дәстүрлі Жолдауын насихаттауға және еліміздегі конституциялық реформалар тақырыбына арналған дөңгелек үстел өтті. Бұл туралы еліміздің Сыртқы істер министрлігі хабарлады.
Дөңгелек үстелге Армения парламентінің депутаттары, мемлекеттік органдарының қызметкерлері, академиялық, сарапшылық және іскерлік ортаның белді тұлғалары, бұқаралық ақпарат құралдарының өкілдері қатысты. Алдағы сәуір айында Арменияда парламенттік сайлау өтетінін, сонымен қатар, ел конституциясына енгізілген өзгерістер бойынша бұл елдің парламенттік басқаруға көшетінін ескерсек, дөңгелек үстел тақырыбы өзекті болғаны түсінікті.
Басқосудың беташарында Қазақстанның Армениядағы елшісі Тимур Оразаев сөз алып, қатысушыларға еліміздің сыртқы және ішкі саясаты туралы, оның негізгі бағыттары жөнінде баяндады. Ел экономикасын кешенді жетілдіру, жаһандық бәсекеге қабілеттілікті арттыру үшін қолға алынған жұмыстар барысы туралы айтты.
Армения парламентінің депутаты А.Бабуханян өз сөзінде саяси, экономикалық салалардағы жоспарлар мен оны іс жүзіне асыруда Қазақстанда оң үрдіс қалыптасқанын тілге тиек етті. Депутаттың пайымдауынша, Н.Назарбаевтың Жолдауында көрсетілген бастамалар тек Қазақстан үшін ғана емес, жаһандық талаптармен бетпе-бет келіп отырған басқа да дамушы елдер үшін маңызды болып табылады. Армения Әкімшілік сотының төрағасы К.Матевосян Қазақсанның мемлекеттік басқару жүйесіндегі өзгерістердің уақтылы қолға алынғанын әрі оның оң нәтиже беретінін атап өтті.
Жиын соңында қатысушыларға Конституцияға енгізілген өзгерістер мен Елбасы Жолдауының армян тіліне тәржімаланған мәтіні, Қазақстан туралы ақпараттар топтастырылған басқа да кітаптар мен материалдар таратылды.