Облыс жақсы дамып келеді

Елбасы Ақжайықтағы екі күндік сапарының қорытындысы бойынша осындай түйін жасады Ақжайыққа жұмыс сапарының екінші күні Республика Президенті Нұрсұлтан Назарбаев Орал қаласында тасқын су зар­да­бына ұшыраған тұрғындар үшін бой көтерген тұрғын үй кешендерімен танысты. Мұндағы бес және тоғыз қабатты тұр­ғын үйлер арнайы сәулеттік жобаларға сәйкес тұрғызылған. Біз кеше «Ақжайық адым­да­ры» атты Елбасының өңірге са­пары жөнінде жазған есебімізде облыс орталығындағы 500 отба­сына арналып тұрғызылған әрі қазір құрылысы аяқталып қалған көп қабатты тұрғын үй кешендері бөлек бір әңгіменің сыбағасы болмақ деген едік. Сол айтылған бөлек әңгімені тарқатып айтудың реті бүгін келіп отыр. Аталмыш тұрғын үй кешені Орал қаласындағы тұтас бір жаңа шағын ауданды құрайды. Ол қазірдің өзінде «Бесінші шағын аудан» деген атауға ие. Мұнда 240 пәтерлі тоғыз қабатты ал­ғаш­қы көп пәтерлі үйдің құ­ры­лысын мердігерлер арасында бірінші болып «Альтаир» құрылыс компаниясының ұжымы аяқтады. Жаңа нысанды мемлекеттік комиссия қыркүйектің тоғызы күні қабылдап алды. Бұл нысанның алғашқы қазығы биылғы көктем­де 26 сәуір күні қаланған. Мемлекеттік комиссия құрылыс сапа­сы­на өте жақсы деген баға беріп отыр. Бұған қоса үй жанында абат­тандыру мен көркейтіп, кө­гал­дандыру жұмыстары қоса жүр­гізілген. Үй ауласына көшет­тер мен гүлдер егіліп, ол қазірдің өзінде көздің жауын алғандай болып құлпырып тұр. Қалған көп қабатты үйлердің пәтерлері де алдағы қазан айындағы жылыту маусымы басталған күнге дейін өз иелерін таппақ. Елдің батыс босағасындағы бесінші шағын ауданның бола­ша­ғы туралы Мемлекет басшысына Батыс Қазақстан облысы әкімінің орынбасары Тимуржан Шәкімов баяндап берді. Алдағы кезде мұнда арнайы жобаға сәйкес әлеуметтік-тұрмыстық нысандар мен мектептер, емхана салынбақ. Сонымен бірге, аталған аудан аумағында Назарбаев интел­лек­туалдық мектебі ғимаратының құрылысы аяқталып келеді. Бұ­ған тиісті қаражат респуб­ли­ка­лық бюджеттен бөлінген. Нұрсұлтан Назарбаев мемлекеттік комиссия қабылдап алған жоғарыда аталған тоғыз қабатты 240 пәтерлі үйдің жанында өңір­дегі құрылыс саласының жетекшілерімен емен-жарқын әңгі­ме­лесті. – Бұл үйдің бас мердігері Александр Потиченко мына тұр­ған азамат, – деп таныстырды Ба­тыс Қа­зақ­стан облысының әкі­мі Б.Ізмұ­хам­бетов Нұрсұлтан Әбіш­ұлы­на құ­ры­лыс тарланын. – Жарайсың! – деп осы сәтте Мемлекет басшысы оның қолын қысты. Сондай-ақ кездесуде Орал қаласындағы «ОтделСтрой» құ­ры­лыс фирмасы сылақшылар бри­гадасының бригадирі Мең­сұ­лу Щербакова мен сырлаушылар тобының жетекшісі Ғазиза Ай­ты­манова Елбасыға өздерінің риза­шы­лық пен алғыс сезімдерін білдірді. – Нұрсұлтан Әбішұлы, орал­дық құрылысшыларға деген сіз­дің қолдауыңыз бен қамқор­лы­ғыңызды сезіну бізді әрдайым үл­кен қуанышқа бөлейді. Қия­лы­мызды көкке самғатады. Бұл біз үшін үлкен мәртебе. Облыстан тыс жерден құрылыс салуға бірде-бір кәсіпорын келген жоқ. Бәрін жергілікті мердігерлер атқарды. Бұл жүздеген, мыңдаған осы жердің тұрғындары тиісті тап­сы­рыс алып, қаражат тапты деген сөз. Соған сай отбасы бюджеттерін толықтырғаны да белгілі. Сол үшін де сізге көп рахмет, Нұр-аға! – деді олар. Қыз Жібектің көшіндей демесек те, өңкей бір қыз-келін­шек­тер­ден құрылған бригада мү­ше­леріне арнайы киім үлгілері үсте­ріне құйып қойғандай жарасып-ақ тұрды. Мұндай ұқыптылық пен тазалық, жинақылық пен құнт­тылық Елбасының көңілінен шыққаны анық еді. Мына түр­ле­ріңмен би кешіне баруларыңа да болғандай екен, – деп әзіл-шы­нын араластыра үн қатты Нұр­сұл­тан Әбішұлы көп ұлт өкіл­де­рінен құралған құрылысшы қыз-келіншектерге. Орал өңірінде тасқын су зар­даптарына ұшыраған тұрғын­дар­ға арналған тұрғын үй кешендері өте қысқа уақыттың аралығында бой көтергені белгілі. Әрине, бұл айтуға ғана жеңіл. Өйткені, ол қолды бір бұлғағанда өзгеріп сала беретін сиқыршының таяғы емес. Міне, осы істің бастама­шы­сы да, дем берушісі де ең алды­мен Елбасы екеніне осы жерде тағы да көз жеткізе түстік. Өйт­кені, Мемлекет басшысы Орал өңіріндегі бүкіл құрылыс жұмыс­та­ры жаз айлары ішінде бітуі керек деген міндет қойдым деген сөзін шегелей жеткізді. Міне, Елбасы қойған міндет пен талап ойдағыдай орындалып келеді. Бұдан артық нендей мерей, нендей мәртебе болмақ! Облыстағы құрылыс маман­дары­мен ой-пікір алмасу бары­сында Президент Нұрсұлтан Назарбаев өзінің екі күндік сапары кезінде көргендері мен көңілге түйгендері туралы да айтып берді. Атап айтқанда, Елбасы тәуел­сіз­дік жылдарында Орал өңірінде болған өзгерістер көңілінен шы­ға­тынын жеткізді. Осы аралықта облыста 66 мектеп, 33 балабақша салынып, пайдалануға беріліпті. Салыстырмалы түрде алғанда, кеңестік дәуірде белгілі бір уақыт өлшеміне шаққанда мұндай нә­ти­же мен көрсеткіш мүлдем болған емес. Осыншама әлеуметтік ны­сан­дар бой көтерген жоқ. Мұның өзі, ең алдымен, тәуелсіздіктің жемісі екені кәміл. Сонымен бірге, тәуелсіздік тұсында өңірді толық газдандыру бағдарламасы іске асқанына Мемлекет бас­шысы көңілі толатынын айтты. – Бұл көрсеткішті 100 пай­ыз­ға жеткізіп пе едіңіздер? – Бұл сау­алды Нұрсұлтан Әбшіұлы Батыс Қазақстан облысының әкімі Бақ­ты­қожа Ізмұхамбетовке қойды. Оған облыс басшысы: – Иә, Сіз айтқан үлкен межеге жақындап келіп қалдық, – деп жауап қайтарды. – Мұның өзі үлкен жетістік. Өңірдегі елді мекендер мен ауыл­дарды түгелге жуық газдандыру шараларын жүргізу арқылы сіздер бұл салада өзге өңірлер мен облыстар арасында көш бастап келесіздер, – деді Президент. Сапары соңында Елбасы та­қ­ы­рыпқа шығарып отырға­ны­мыз­дай, облыс жақсы дамып келеді деп түйін жасады. Темір ҚҰСАЙЫН. Батыс Қазақстан облысы.