Заманауи қару мен әскери техника өндірісінің жайы талқыланды

Астанада Қорғаныс министрлігі мен Қорғаныс және аэроғарыш өнеркәсібі министрлігінің бірлескен кеңесі өтті, деп хабарлады primeminister.kz. Күн тәртібінде министрліктер арасындағы әрі қарайғы өзара іс-қимыл мәселелері қаралып, отандық қорғаныс-өнеркәсібі кешенін дамытудың стратегиялық бағыттары талқыланды. Қазақстан қорғаныс ведомствосының басшысы генерал-полковник С. Жасұзақов Қорғаныс министрлігі отандық қорғаныс кәсіпорындарының өнімдері мен қызметтеріне негізгі тапсырыс беруші болып табылатынын, және әскери өнімді жеткізіп берудің сапасы мен уақыттылығына армияның жауынгерлік қабілеттілігі мен жалпы мемлекеттің қорғаныс қабілеттілігі тікелей байланысты екенін атап өтті. Қорғаныс министрлігінің хабарлауынша, кеңес барысында заманауи қару-жарақ пен әскери техниканың жоғары технологиялық өндірісін әрі қарай ретке келтіру мақсатында қару-жарақтың негізгі түрлеріне техникалық қызмет көрсету және жөндеу жүйесі бойынша тұжырымдамалық ұсыныстар егжей-тегжейлі пысықталды. Естеріңізге сала кетсек, Қорғаныс және аэроғарыш өнеркәсібі министрлігі Қазақстан Республикасы Президентінің 2016 жылғы 6 қазандағы  №350 Жарлығына сәйкес құрылған болатын.