Мақат – Атыраудағы өндірісті ауданның бірі. Мұнда жеті қат жер астындағы табиғи байлық – мұнай мен газды ел кәдесіне жаратушы мұнайшылар шоғыры қалыптасқан. Тіпті, екінші дүниежүзілік соғыс жылдарында осындағы Доссор кенті маңынан өндірілген мұнай майдандағы танктерге құю үшін тікелей жөнелтілгені де тарихтан белгілі.
Бұрын мұнда мұнай-газ өнеркәсібі мен темір жол саласының экономиканы өрге сүйрейтін басымдығы бар еді. Ал қазір ауданның экономикалық-әлеуметтік ахуалын жақсартуға септесетін салалардың қатарын шағын және орта кәсіпкерлік те толықтырды.
Кеше дәл осы ауданға арнайы аялдаған «Тәуелсіз Қазақстан» пойызының штаб жетекшісі Әміржан Әлпейісов бастаған салалық министрліктер мен түрлі комитеттердің, ұлттық холдингтердің таңдаулы өкілдері мен жетекші мамандарынан құралған топты жұртшылықпен бірге қарсы алған аудан әкімі Берікқали Сәрсенғалиевтің айтуынша, Мақатта сан алуан жобалар іске асырылуда. Былайша айтқанда, тәуелсіздік жылдарында аудан тұрғындарының еңсесі тіктелді. Оған мемлекет тарапынан көрсетілген қолдау мен көмектің оразан зор пайдасы тиген. Сондай қолдауды да, көмекті де табиғи апаттың салдарынан баспанасы бүлінген тұрғындар анық сезінді. Оларға ұлттық компаниялардың қолдауымен жаңа тұрғын үйлер салынып берілді. Жас мамандар да баспанамен қамтылуда.
– Кең жазиралы даламызды баянды мекеніне айналдырған көп этносты елімізде тәуелсіздік жылдарында бекем бірлігі мен ырысты ынтымағына сызат түспеді. Бұған жаһанның барша жұрты қызығып қарайды. Қарашаңырақ – Қазақстанымыздағы өркенді өзгерістерге, түтіні түзу тыныштыққа қызғана қарайтындар да бар. Біз үшін ең бастысы – еліміздің өсіп-өркендеуі, ынтымағымыздың бекемделе түсуі, – деді «Тәуелсіз Қазақстан» пойызының штаб жетекшісі Әміржан Әлпейісов.
Шын мәнінде, бұл пойыздың келуіне аудан тұрғындары қызығушылық танытты. Білікті дәрігерлер аудандық ауруханада түрлі сырқаты бар тұрғындардың талап-тілегін жіті тыңдап, өз кеңестерін берді. Бірі жүрегін тыңдатты, енді бірі қан қысымын өлшетті. Көз жанарын көрсеткендер де бар. Дәрігерлер алдына келген тұрғындардың барлығына медициналық көмегін көрсетті. Дұрыс тамақтану мен тынығудың маңыздылығын да тұрғындарға түсіндірді. Мәселен, Серікбай Сақтағанов пойыз құрамымен келген жоғары санатты кардиологтың кеңесімен жүрегіне ем-дом жасаудың жолын білгеніне ризашылығын білдірді. Сол секілді кәсіпкер Саламат Қуанышев «Атамекен» ұлттық кәсіпкерлер палатасының өкілдерінен кәсіпкерлікті одан әрі кеңейту үшін көрсетілетін қолдаудың жай-жапсарына қанықты.
– Тәубе деп айталық, еліміз үшін биылғы жылдың маңызы айрықша. Өйткені, жақында Тәуелсіздігіміздің 25 жылдық мерейтойын атап өтеміз. Бұл мерейтойға еліміз үлкен жетістікпен жетіп отыр. Еліміз өркендеді, отандық өнімдеріміз шығарылып жатыр. Кәсіпкерлер де елге қызмет етуді үйренді. Дегенмен, мәселенің бәрі бірден шешімін таба қоймайды. Кейде әлдебір мәселе үшін облысқа, тіпті Астанаға дейін барудың қажеттігі туындап жатады. Адам болған соң сырқаттанбай тұра ма? Кей сырқат жандар жанына шипа іздеп Астана, Алматы секілді ірі қалалардағы білікті дәрігерлерге баруына мүмкіндігі бола бермейді. Ал бүгін ауданымызға кәсіби дәрігерлер де, түрлі саланың жетекші өкілдері де келіп, қабылдау жүргізді. Бұл – біз үшін үлкен қуаныш, – дейді аудандық ардагерлер кеңесінің төрағасы Сәбит Қаленов.
Иә, Мақат ауданының тұрғындары «Тәуелсіз Қазақстан» пойызының өкілдерінен «Жұмыспен қамтудың жол картасы-2020», «Жастар тәжірибесі», «25 жылдың белестері» және мемлекеттік қызметтер ұсыну мәселелері бойынша ақыл-кеңес алды.
Жолдасбек ШӨПЕҒҰЛ,
«Егемен Қазақстан»
Атырау облысы