Жаңа бағыттағы әуе рейсі ашылады

2017 жылдың соңында не 2018 жылы Астана мен Тель-Авив арасында тікелей әуе рейсі ашылатын болады. Бұл туралы бүгін Қазақстан-Израиль сауда-экономикалық ынтымақтастығы жөніндегі 7-ші отырыс барысында Инвестициялар және даму министрлігінің Азаматтық авиация комитеті төрағасының орынбасары Талғат Ластаев мәлім етті, деп хабарлайды ҚазАқпарат. Оның атап өтуінше, 1995 жылы екі елдің арасындағы келісімге сәйкес Алматы мен Тель-Авив арасында тікелей әуе рейсі ашылған. Ендігі уақытта Қазақстан тарабы дәл осындай рейсті Астана мен Тель-Авив арасында ашуға ниетті. «Біздің тараптан Премьер-Министрдің (Израиль үкімет басшысы Б.Нетаньяху ағымдағы жылдың желтоқсан айының ортасында Қазақстанға сапармен келеді деп күтілуде - автор) сапары аясында жаңа құжатқа қол қойып, оған Астананы қосу және рұқсат етілген рейс санын көрсету жайында ұсыныс бар. Яғни, ұшуларды бастауға құқықтық база жасау қажет. Біз осындай ұсыныс жасаймыз және сапар аясында қол қоюға дайынбыз», - деді ол. Ластаевтың сөзіне қарағанда, Эйр Астана компаниясы 2017 жылдың соңында немесе 2018 жылдың басында Астана мен Тель-Авив арасында әуе қатынасын орнатуды жоспарлауда. «Бұған қоса, біз ЭКСПО кезіне біржақты тәртіппен израильдік әуе компанияар үшін барлық ұшуларға шектеулерді алып тастаймыз. Яғни, израильдік компаниялар тарабынан Қазақстанға ұшып келуге ниет болса, онда біз оны қолдаймыз. Жобаға қатысты біз өз коментарийімізді бердік, израиль тарабы қарады, алмасу болды», - деп атап өтті Ластаев.